Atalǵan júıeni kelesi jyldyń birinshi jartyjyldyǵynda ónerkásiptik paıdalanýǵa engizý josparlanyp otyr
Kóliktik baqylaý kezinde talap etiletin qujattardy elektrondyq formatqa aýystyrý úshin Qazaqstan Respýblıkasynyń Kólik mınıstrligi pılottyq rejımde kólik qujattaryn basqarýdyń biryńǵaı júıesin engizip jatyr, dep habarlaıdy almaty-akshamy.kz.
Kólik qujattaryn basqarýdyń biryńǵaı júıesi tasymaldaý salasynda qyzmet alý úrdisin barynsha qaýipsiz etip, ashyqtyqty odan ári arttyrýǵa, sondaı-aq tasymaldaý prosesterin ońtaılandyrýǵa, júkterdi jetkizý merzimderin qysqartýǵa, esutd.gov.kz saıtynyń mobıldi nusqasy nemese QR kodyn skanerleý arqyly álemniń kez kelgen núktesinen elektrondyq qujattarǵa jedel qol jetkizýge yqpal etedi.
Esterińizge sala keteıik, buǵan deıin 2021 jylǵy 25 mamyrda QR Indýstrıa jáne ınfraqurylymdyq damý mınıstriniń buıryǵymen Kólik qujattaryn basqarýdyń biryńǵaı júıesin uıymdastyrý jáne paıdalaný qaǵıdalary, atalǵan júıege tirkeý, esepke alý, óńdeý jáne saqtaýǵa qajet qujattar tizbesi bekitilgen bolatyn.
Keıin Indýstrıa jáne ınfraqurylymdyq damý mınıstriniń 2021 jylǵy 16 maýsymdaǵy №307 buıryǵymen avtomobıl kóligimen júkterdi tasymaldaý qaǵıdalaryna ózgerister engizildi (QR Investısıalar jáne damý mınıstriniń 2015 jylǵy 30 sáýirdegi № 546 buıryǵymen bekitilgen). Atalǵan ózgeristerge sáıkes qujattardy qaǵaz tasyǵyshta resimdeý kezinde tehnıkalyq ruqsat etilgen maksımaldy salmaǵy 3,5 tonnadan asatyn tasymaldaýshy men júk jóneltýshi olardy kólik qujattaryn basqarýdyń biryńǵaı júıesinde tirkeýdi qamtamasyz etedi: jol paraǵy – aýysym (reıs) bastalǵanǵa deıin; taýar-kólik júkqujaty - júk jóneltilgenge deıin.
Qazirgi ýaqytta memlekettik tehnıkalyq qyzmet mamandarymen birlesip, Kólik qujattaryn basqarýdyń biryńǵaı júıesiniń aqparattyq qaýipsizdik talaptaryna sáıkestigi synalyp jatyr. Sonymen qatar tasymaldaýshylarǵa yńǵaıly bolý úshin júıeniń mobıldi qosymshasy ázirlenip jatyr. Osyǵan baılanysty júıeni 2024 jyldyń birinshi jartyjyldyǵyna ónerkásiptik paıdalanýǵa berý josparlanǵan.