Qazaqstan, Ázirbaıjan jáne Ózbekstan «jasyl» energetıka eksporty boıynsha tehnıkalyq tapsyrma men birlesken kásiporyn daıyndaý týraly kelisti.
Baký qalasynda ótken Ázerbaıjan, Ózbekstan jáne Qazaqstan energetıka jáne ekonomıka mınıstrleriniń Ortalyq Azıa elderinen Ázerbaıjan aýmaǵy arqyly Eýropaǵa elektr energıasyn eksporttaý perspektıvalaryn talqylaý jónindegi kezdesýinde tıisti kelisimge qol jetkizildi, dep habarlaıdy Almaty-akshamy.kz QR Energetıka mınıstrligine silteme jasap.
Kezdesý qorytyndysy boıynsha vedomstvo basshylary birlesken komúnıkege qol qoıdy, onda elderdiń jańartylatyn energıa salasyndaǵy áleýetin jáne balamaly kózderden alynǵan elektr energıasyn Eýropaǵa eksporttaý jobasyna qosylýǵa daıyndyǵyn atap ótti.
Qatysýshylar jańartylatyn energıa kózderine basa nazar aýdara otyryp, energıa almasý salasyndaǵy, jasyl sýtegi men jasyl amıakty ázirleý jáne eksporttaý múmkindikteri jáne ilespe ınfraqurylymdyq salasyndaǵy yntymaqtastyq jónindegi tehnıkalyq tapsyrmany ázirleý úshin birlesken jumys tobyn qurý týraly kelisimge keldi.
Ázirlengen jáne bekitilgen tehnıkalyq tapsyrma negizinde aldyn ala tehnıkalyq-ekonomıkalyq negizdemeni daıyndaýǵa tender jarıalanatyn bolady. Sondaı-aq, qatysýshylar jobany iske asyrý úshin birlesken kásiporyn qurý perspektıvasyn zerdeleýge kelisti.
Ekonomıka jáne energetıka mınıstrleri deńgeıindegi kelesi kezdesý Ózbekstan Respýblıkasynyń Tashkent qalasynda ótedi.