Qazaqstannyń klasık aqyny, mádenıet jáne qoǵam qaıratkeri Esenǵalı Ábdijapparuly Raýshanovtyń qurmetine ornatylǵan memorıaldyq taqtanyń ashylý saltanaty ótti.
Memorıaldyq taqtanyń ashylý saltanatyna aqynnyń jaqyn týystary, dostary jáne Mańǵystaý oblysynan kelgen qonaqtar qatysty. İs-shara barysynda Almaty qalasy Mádenıet basqarmasynyń basshysy Ǵanı Maılybaev quttyqtaý sóz sóıledi.
– Esenǵalı Raýshanovtyń árbir sózinde, árbir áripinde qulaqta qalatyn, erekshe yrǵaq bar edi. Artynan óshpes iz qaldyrǵan tulǵa. Myqty shákirtter, jaqsy urpaq tárbıelep qaldyrdy. Tarıhta qalǵan esimi óshpek emes. Shyǵarmalary qoǵam mádenıetin damytýǵa, rýhyn kóterýge óz úlesin qosyp, dáriptele berse deımiz. Mektep qabyrǵalarynda, joǵary oqý oryndarynda aǵamyzdyń esimi aıtylyp úlken deńgeıdegi keshter ótkizile beredi. Búgingi taqtanyń ashylýy bir tarıhı oqıǵa, – dedi Ǵ.Aıdaruly.
Memorıaldyq eskertkishtiń ashylýyna kýá bolǵandar qatarynda aqyn, Memlekettik syılyqtyń laýreaty, qoǵam qaıratkeri Temirhan Medetbek pen profesor, pedagogıka ǵylymynyń doktory Jaýynbaı Qaraev óz oılarymen bólisip, jyly lebizderin bildirdi.
– Qazaq poezıasyndaǵy iri tulǵalardyń biri osy Esenǵalı Raýshanov boldy. Onyń rýhanı óleńderi eshqashanda tozbaıdy, halyq aýzynan túspesi belgili. Jazǵan óleńderi eldiń, jerdiń, qoǵam men áleýmettik jaǵdaı týraly boldy. Halyqtyń oıynda ne bolsa, sonyń bárin shyǵarmalarynda jazdy. Ol abyroımen kelip, abyroımen ketken aqıyq aqyn, – dedi T.Medetbek.
– Bul memorıaldyq taqtanyń ashylýy úlken mádenı jańalyq. Aqyndyq jolyna qaraıtyn bolsaq, Esenǵalı óziniń kókmoınaq jyrlarymen erekshelenetin. Talaı jarystardan báıge bastap dara keletin. Sonyń arqasynda jas kezinen úlken belesterden kórinetin, kóziniń tirisinde klasık aqyn atandy. Onyń jyrlary úlken fılosofıalyq kategorıalarǵy toly tereń maǵynaly týyndylar. Shyǵystyń sarynymen jazylatyn jyraýlyq sıpatqa ıe shyǵarmalary bar. Ol qazir qazaq poezıasynyń juldyzyna aınaldy. Onyń juldyzy Esenınniń juldyzynyń janynda jarqyrap tur dep aıta alamyn, – dedi J.Qaraev.
Qazaqtyń basyna bitken daryndy aqyny Esenǵalı Raýshanovtyń qurmetine qoıylǵan eskertkish-taqtasy ózi turǵan úıde ornatylyp otyr. Memorıaldyq taqta ornatylǵan ǵımarattyń mekenjaıy: «Samal-2» shaǵynaýdany, 42-úı (Meńdiqulov kóshesiniń qıylysy).
