Jańa kezeń bastaýy
Qazaqstan men Ázirbaıjan arasynda dıplomatıalyq qarym-qatynas ornaǵanyna 30 jyl tolyp otyr, dep habarlaıdy Almaty-akshamy.kz QazAqparat-qa silteme jasap.
Osydan týra 30 jyl buryn, dálirek aıtsaq, 1992 jyldyń 27 tamyzda Qazaqstan men Ázirbaıjan arasyndaǵy dıplomatıalyq qarym-qatynas ornyqqan edi.
Tarıhı ólshemmen qaraǵanda bul qysqa merzim bolyp kórinýi múmkin. Biraq baýyrlas elderdiń memleketaralyq qatynastary dál osy kezeńde qalyptasyp, nyǵaıdy.
2005 jyly Bakýde qol qoıylǵan Strategıalyq seriktestik jáne odaqtastyq qarym-qatynas týraly shart eki eldiń yntymaǵyn jańakezeńge shyǵardy.
Basqasha aıtsaq, eki eldiń dostyǵy men odaqtas qatynastary osy qujattan tamyr alyp jatyr.
Postkeńestik aýmaqtaǵy baýyrlas eki el bir-biriniń egemendigi men aýmaqtyq tutastyǵyn sózben ǵana emes, naqty is-áreketpen de ashyq qoldap keledi.
Kópvektorly jáne teńgerimdi syrtqy saıasat qazirgi zamanǵy syn-qaterlerde, onyń ishinde álemde sońǵy aılarda baıqalǵan geosaıası týrbýlenttilik jaǵdaıynda óziniń myzǵymastyǵyn kórsetti.
Búginde Qazaqstan men Ázirbaıjan arasynda maquldanǵan túrli sıpattaǵy 90-ǵa jýyq qujattardyń bazasy bar. Onyń ishinde memleketaralyq sharttar, úkimetaralyq kelisimder jáne ózge de qujattar bar.
Yntymaqtastyq formatyna kelsek, ol kópjaqty bsıpatqa ıe. Al BUU, EQYU, IYU, AÓSSHK, TÚRKSOI, OTG sıaqty halyqaralyq jáne óńirlik uıymdardyń bárinde eki eldiń áreketi úılesim tapqan.
Sonymen qatar, eki eldiń zańnamalyq organdary arasynda tyǵyz ózara is-qımyl jolǵa qoıylǵan. Memleketter arasyndaǵy ekijaqty baılanystardyń negizine saıası ǵana emes, ekonomıkalyq qatynastar da kiredi.
Ázirbaıjan búginde Qazaqstannyń ońtústik Kavkazdaǵy negizgi saýda-ekonomıkalyq áriptesi bolyp esepteledi.