Qazaqstanda Memleket basshysynyń tapsyrmasyna sáıkes aýyldyq densaýlyq saqtaý júıesin jańǵyrtýǵa baǵyttalǵan ulttyq joba júzege asyrylyp jatyr.
Jobanyń maqsaty — medısınalyq-sanıtarlyq alǵashqy kómekti damytý jáne ınfraqurylymdy jańartý arqyly aýyldyq jáne shalǵaı eldi meken turǵyndaryn sapaly medısınalyq qyzmetpen qamtamasyz etý, dep habarlaıdy aqshamnews.kz.
Ulttyq jobanyń sheńberinde 655 MSAK nysanyn – dárigerlik ambýlatorıa, feldsherlik-akýsherlik jáne medısınalyq pýnktter salý josparlanǵan. Búgingi kúni 473 nysan paıdalanýǵa berildi, qalǵan 182 nysandy bıylǵy jyldyń sońyna deıin aıaqtaý kózdelgen.
Jańa nysandar tozyǵy jetken jáne apatty jaǵdaıdaǵy 427 ǵımarattyń ornyna, medısınalyq ınfraqurylymy joq nemese jaldamaly ǵımarattarda ornalasqan aýyldardaǵy 208 nysannyń ornyna, buryn múlde medısınalyq mekeme bolmaǵan jáne mamandar jumys istemegen 20 eldi mekende salynyp jatyr.
Sonymen qatar, 32 aýdandyq aýrýhana aýdanaralyq aýrýhana deńgeıine deıin jańǵyrtylýda.
Jobanyń sheńberinde aýyldyq medısınalyq mekemeler zamanaýı dıagnostıkalyq jáne zerthanalyq jabdyqtarmen, telemedısına apparattarymen qamtamasyz etiledi. Bul aýyl turǵyndaryna óz eldi mekenderinen shyqpaı-aq, bilikti dárigerlik kómek alýǵa múmkindik beredi.
Jalpy el boıynsha aýyl turǵyndaryna 3,5 myńnan astam feldsherlik-akýsherlik jáne medısınalyq pýnktti, 1300 dárigerlik ambýlatorıany, 148 emhanany,175 aýrýhanany qosa alǵanda medısınalyq kómek kórsetetin 5 myńǵa jýyq densaýlyq saqtaý nysany jumys isteıdi.