Almatyda belgílí jurnalıst Batyr Qazybaev turaly kítaptyń tūsaukeserí óttí, - dep habarlaıdy aqshamnews.kz tílshísí.
12 mausymda Almatyda tanymal jurnalıst, Alash Media Group holdıngíníń basshysy Batyr Qazybaevtyń qūrmetíne arnalǵan "Ostatsya svetom" atty kítaptyń tūsaukeserí óttí.
Onda tanymal medıamenedjerler, jurnalıster men tūlǵalar jınaldy. Olardyń qatarynda Láılá Sūltanqyzy, Zeınep Ahmetova bar.
Būl jınaq – Batyr Qazybaevtyń ómírí men eńbegí turaly estelíkterden qūralǵan. Kítaptyń jaryq kóruíne onyń otbasy múshelerí, ásírese úlken ápkesí, jaqyndary, dostary men áríptesterí atsalysqan. Kítapta Batyr Qazybaevtyń ózí túsírgen sırek arhıv suretter de bar.
"Batyr nebárí 53 jyl ómír súrdí. Bíraq ūzaq ómír súrgen dara tūlǵalarmen teń dárejede eńbek ettí. Onyń jurnalıstıkadaǵy ózíndík stılí bolatyn. Ūlymnyń áríptesterí onyń eńbegín ūmytpaıdy dep senemín. Esímí halyq jadynda saqtalady", — dedí Batyrdyń anasy Orynsha Qarabalına-Qazybaeva.
Sondaı-aq, ol kítap avtorlaryna jáne onyń jaryq kóruíne úles qosqan barsha janǵa alǵysyn bíldírdí.
Batyr Qazybaev turaly ne belgílí?
Batyr Qazybaev – tanymal qazaq jazushysy árí jurnalısí Kákímjan Qazybaevtyń ūly. Ol ómír boıy medıasalada eńbek etíp, Alash Media Group holdıngín basqardy. Būl holdıng qūramynda Tengrinews.kz, Vesti.kz, Massaget.kz saıttary men "Jūldyz FM" jáne "Retro FM Qazaqstan" radıolary bar. Sonymen qatar, ol The Spirit of Tengri etnıkalyq muzyka festıvalíníń negízín qalaǵan jáne "Jetínshí arnanyń" írgetasyn qalaushylardyń bírí bolǵan.
Belgílí medıamenedjer 2022 jyly ūzaqqa sozylǵan auyr dertten keıín ómírden ozdy.