Almatyda jas mýzykanttardan quralǵan DA Musiq Orchestra álemge áıgili kompozıtor Hans Sımmerdiń shyǵarmalarynan erekshe konsert uıymdastyrdy. Áıgili fılmderdiń saýndtrekterin tyńdaý kesh qonaqtaryna tereń áser berip, ónerpazdardyń joǵary deńgeıdegi oryndaýshylyq sheberligine kýá boldy.
Almatyny sazdy áýenmen terbegen kesh Qurmanǵazy atyndaǵy Qazaq ulttyq konservatorıasynyń janyndaǵy Kúlásh Baıseıitova atyndaǵy mamandandyrylǵan mýzykalyq mektepte ótti. Konsert barysynda Hans Sımmerdiń 12 týyndysy tartý etildi.
Jas talanttardan quralǵan erekshe orkestr
DA Musiq Orchestra jetekshisi ári negizin qalaýshy Damıanı Myrzaǵalıev ne úshin bul týyndylar tańdalǵany týraly túsindirdi. «Bul fılmderdiń kórermenderi áli de kóp, olardyń esinde bul saýndtrekteri máńgige saqtalyp qalǵan. Tyńdarmandar konsert kezinde súıikti fılmderiniń atmosferasyna qaıta oralyp, erekshe áser alady. Sondyqtan biz de Hans Sımmer shyǵarmalaryn tańdadyq. Bul keshte kórermender “Interstellar” fılmine jazylǵan tanymal kompozısıany tyńdaı aldy. Sonymen qatar, konsert baǵdarlamasyndaǵy keıbir mýzykalyq shyǵarmalarǵa ózim óńdeý jasadym”, – Damıanı Myrzaǵalıev.
Jas talanttardan quralǵan erekshe orkestr DA Musiq Orchestra – ártúrli jastaǵy jas mýzykanttardy biriktirgen erekshe sımfonıalyq jáne hor ujymy. Orkestr quramynda 5-synyp oqýshylarynan bastap, konservatorıanyń 1-kýrs stýdentterine deıingi ónerpazdar bar. Bul – olardyń atalmysh mektep qabyrǵasynda ótkizgen ekinshi konserti.
Kórermenniń ystyq yqylasy
DA Musiq Orchestra-nyń kezekti konsertine jınalǵan jurshylyq zaldy toltyrdy. Kesh qonaqtarynyń qatarynda TAN Consulting agenttiginiń jetekshisi Aıda Dosaeva, “Alataý Aqparat” medıa holdıńiniń bas dırektory Erjan Qalymbaıuly, Halyk Bank-tyń PR-qyzmetiniń basshysy Gúlmıra Arbabaeva, Stan.kz aqparat agenttiginiń damý jónindegi dırektory Shyńǵys Mádibek, Interact Club Rotary International volonterlik uıymynyń joba menedjeri Dýlat Danıar da boldy.
Kesh qonaqtary jan tebrenterlik ásem mýzykadan áserlerin jasyra almady. «Biraq búgingi keshtiń jóni bólek. Biz osyndaı jas talanttardyń ósip kele jatqanyn kórip, qýanyp otyrmyz. Konsert barysynda tebirendik, tolqydyq, kózimizge jas keldi. Oryndaýshylardyń kásibıligi tańǵaldyrdy”, – deıdi Erjan Qalymbaıuly.
Álemge keń tanymal óner týyndylarynan berilgen konsert jas ónerpazdardyń kásibı deńgeıiniń asa joǵary ekenin tolyq tanytty. DA Musiq Orchestra bolashaqta jańa konsertter uıymdastyryp, tyńdarmandaryn áserli áýenderimen qýanta bermek.
