Kórmege álemniń 58 elinen 213 sýretshi qatysady, 430-dan astam jumys usynylady, olardyń 80-i tikeleı bıennalege arnalǵan.
Bıyl Qazaqstan 59-shy Venesıa bıennalesine tuńǵysh ret óz ulttyq pavılonymen qatysady. Ataýly is-shara 23 sáýir men 27 qarasha aralyǵynda ótedi, dep habarlaıdy Almaty-akshamy.kz QazAqparatqa silteme jasap.
Buǵan deıin Qazaqstan sýretshileri bıennalege 2005 jyldan 2013 jylǵa deıin Ortalyq Azıa elderiniń pavılony aıasynda, al keıingi jyldary jeke bastamalar aıasynda qatysyp kelgen edi.
Qazaqstan pavılony jobasyn ORTA shyǵarmashylyq ujymy men Ábilhan Qasteev atyndaǵy óner mýzeıi birlesip jeke qaıyrymdylyq qorlar men Qazaqstan Respýblıkasy Mádenıet jáne sport mınıstrliginiń qoldaýymen júzege asyryp jatyr. Pavılon taqyryby almatylyq sýretshi jáne jazýshy Sergeı Kalmykovqa arnalǵan, onyń shyǵarmashylyǵy brıtandyq súrealıs Leonora Karrıngtonnyń «Armannyń bal dámi» atty kitabynyń qurmetine tańdalǵan bıylǵy bıennalemen tyǵyz baılanysty.
Osynyń negizinde otandyq pavılon álemge áıgili zamanaýı óner qaıratkerleriniń ekspozısıalarymen bir qatarda tur.
İs-sharaǵa qatysýshylardyń aldynda sóılegen sózinde mádenıet jáne sport mınıstri Dáýren Abaev uıymdastyrýshylarǵa, mesenattarǵa, dıplomattar men sýretshilerge alǵysyn bildirdi.
«Munda «Qazirgi zamanǵy óner áleminiń olımpıadasy» talanttardy izdeıdi. Bizdiń álemge kórsetetin dúnıelerimiz bar, maqtana alatyn jáne tań qaldyratyn nárselerimiz bar. Barlyq ýaqytta da sýretshilerimiz ózindik ereksheligi men qaıtalanbas qoltańbasymen daralanady», - dedi mınıstr.
Sondaı-aq, Dáýren Abaev Qazaqstannyń osy kórmege qatysýy ıgi dástúrge aınalatynyna jáne bolashaqta qazaqstandyq sýretshilerdiń joǵary deńgeıdegi shyǵarmashylyq jetistikteriniń kýási bolatynymyzǵa senim bildirdi.
Óz kezeginde qazaqstandyq pavılonnyń komısary Merýert Qalıeva Venesıada qazaqstandyq pavılonnyń ashylýymen qatar, bıyl jazda Qazaqstanda arnaıy pavılon baǵdarlamasy iske qosylatynyn atap ótti.
«Kelýshiler sońǵy bes jyl ishinde óziniń jańashyl ıdeıalarymen jumys istep kele jatqan ORTA sıaqty Kalmykovtyń álemine tań qalatynyna senimdimin. Venesıa bıennalesindegi Qazaqstannyń ulttyq pavılony qazaqstandyq art-sahnada kópten kútken oqıǵa boldy, osy jobamen jumys isteıtin komandanyń bir bóligi bolý men úshin úlken mártebe. Ótken jyldary Venesıada Qazaqstannyń ulttyq pavılonyn talqylaýǵa bastamashylyq etý úshin qatarlas baǵdarlamalar, kórmeler men jobalar uıymdastyrǵan sýretshilerdiń, kýratorlar men ónertanýshylardyń kúsh-jigerinsiz pavılon ashylmas edi», - dedi Merýert Qalıeva.
Venesıa bıennalesi 1895 jyldan bastap Venesıada eki jylda bir ret ótkiziletin eń bedeldi halyqaralyq kórmelerdiń biri ekenin atap ótken jón.
Bul aıtýly oqıǵa álemdik ónerdiń damý baǵytyn aıqyndaıdy, sondaı-aq zamanaýı trendterdi keńinen tanystyrady.