Jaqynda taǵy bir reseılik banktiń enshiles uıymy otandyq banktiń birimen kelisimge keldi.
SentrKredıt Banki «Álfa-Bank Qazaqstandy» satyp aldy. Endi Álfa-Bank aksıonerler quramynan shyǵyp, óz ókilderin dırektorlar keńesinen keri qaıtarady. Banktiń baspasóz habarlamasynda osylaı delingen, dep habarlaıdy Almaty-akshamy.kz 24.kz-ke silteme jasap.
Qos tarap arasyndaǵy mámile zańdy túrde aıaqtalǵanda, «Álfa-Bank Qazaqstanǵa» rebrendıng júrgiziledi. Osylaısha ol tolyqtaı qazaqstandyq bankke aınalady. Sondaı-aq aksıoner klıentter aldyndaǵy barlyq mindettemelerdi oryndaý úshin bankti qosymsha ótimdilikpen qoldaýǵa daıyn ekenin habarlady.
Eske salaıyq, qazaqstandyq Álfa-Bankke qatysty sanksıalar 6 mamyrda kúshine enetini aıtylǵan. Sanksıa astynda qalmaý úshin qarjy uıymy jańa aksıoner izdegen. «Rısk Teıker» sarapshylary bul mámile SentrKredıt Bankke bolashaqta kapıtalyn ulǵaıtýǵa múmkindik beredi dep sanaıdy. Buǵan deıin sarapshylar sanksıaǵa ilingen bankterdi úlken jeńildikpen satyp alady dep boljaǵan.