Vashıngtonda turatyn otandasymyz án shyǵaryp qana qoımaı, álemdik hıt ánderdi qazaq tiline, al qazaq ánderin aǵylshyn tiline aýdaryp júr.
Anar Ómirzaq (Anar KZ Omirzaq) Vashıngton qalasynda turady. Onyń aıtýynsha, qańtar oqıǵasy syrttaǵy qazaqtarǵa óte aýyr tıgen. Táýelsizdikke tikeleı qaýip tóngende, elmen birge bola almaǵan otandastarymyz syrt memlekette jıi kezdesip, qatty alańdaǵanyn, jyraqtaǵy eliniń taǵdyry úshin aqyldasqanyn aıtqan, dep habarlaıdy Almaty-akshamy.kz
El turǵyndary ǵana emes, shetelde júrgen qazaqtar da qatty kúızeliske túsken.
«Pandemıa kezinde Qazaqstandaǵy kóptegen tanymal adamdar, óner, qoǵam qaıratkerleri de qaıtys boldy. Sol kezde jubatý ánin shyǵardym. Osyndaǵy jáne eldegi adamdarǵa jubanysh bolsynshy dep oıladym. Uzaqqa jalǵasqan, adamdardy kúızeliske túsirgen pandemıadan soń qańtar oqıǵasy boldy. Sondyqtan elime, alystaǵy halqyma kóńil aıtqym keldi. Kóńil aıtýdy, jubatýdy beınebaıan arqyly jetkizgim keldi. Qazaǵymdy qolymnan kelgenshe jubatyp, dem bergim keledi», – deıdi Anar Ómirzaq.
Anar AQSH-qa alǵash ret 18 jasynda barǵan. Ál-Farabı atyndaǵy Qazaq ulttyq ýnıversıtetine oqýǵa túskenimen, 1-kýrsynda-aq Amerıkanyń oqý grantyn utyp alypty. Joldyń qashyqtyǵyna qaramastan, eki memlekettegi oqý oryndarynda kezek bilim ala júrip, qos ýnıversıtetti de bitirip shyqqan. Magıstratýra dıplomyn alǵan soń qos eldiń arasynda jumys istep, keıin Vashıngtonǵa birjolata qonys aýdarǵan. Onyń aıtýynsha, Amerıkadaǵy qaı salany alyp qarasa da, báseke óte joǵary. Al mýzykant, ánshi bolý, festıválderge qatysyp, ózińdi moıyndatý – muhıttan injý-marjan izdegendeı dep sanaıdy ol.
«Patrıottyq jáne lırıkalyq ánder jazamyn. 18 jasymda aǵylshyn tilin erkin meńgergen soń, óleńderdi sol tilde de jaza bastadym. 7 jasymnan bastap qazaq-orys tilinde óleńder shyǵardym. Ákem opera ánshisi edi, meniń on jasymda qaıtys bolyp ketti. Atam da jyraý bolǵan. Óner maǵan sol kisilerden daryǵan shyǵar. Qazaq ádebıetindegi fólklordy paıdalanyp «Jubatý» ánin jazdym. Basqa ánderimniń sózin de, mýzykasyn da ózim jazdym», - deıdi ánshi.
Ol jýyrda ǵana Dımash Qudaıbergenniń oryndaýyndaǵy «Qaıran elim» ánin aǵylshyn tiline aýdaryp bitken. Onyń aıtýynsha, Dımashtyń fanattary Amerıkada óte kóp. Alaıda olar qazaq ánshisiniń oryndaýyndaǵy ánderdiń maǵynasyn túsine almaı qınalady.
Pop janrynda án jazatyn Anardyń negizgi jumysy – bıznes-konsaltıng. Amerıkada suranysqa ıe bıznes-koých atanyp ta úlgergen.