Asqat Aımaǵambetovtiń aıtýynsha, qazaq tilindegi múltfılmder óte az, al YouTube sıaqty qoljetimdi platformalarda múlde joqtyń qasy.
Depýtat «Balapan» telearnasynyń kontent jasaýshylarǵa tóleıtin qarajaty óte az bolǵandyqtan, olar tek qazaq tilin qoldaý maqsatynda volonter sıaqty jumys istep otyrǵanyn aıtty, dep habarlaıdy aqshamnews.kz
«Búgingi kúni bul úlken másele, óıtkeni balalar teledıdardan góri ınternet pen YouTube-ty kóbirek tańdaıdy. Balalar «Sınıı traktor» men «Masha ı Medved» sıaqty múltfılmdermen shektelmeı, sapaly ári qyzyqty qazaqsha múltfılmderdi kórýi tıis» dedi depýtat telegram arnasynda.
Osy maqsatta, kelesi jyldyń búdjet jobasyn qarastyrý barysynda, qazaq tilindegi múltfılmder jasaýǵa 350 mıllıon teńge bólýdi jáne olardyń tek teledıdarǵa emes, mindetti túrde ınternetke, sonyń ishinde YouTube-qa júktelýin qamtamasyz etetin normany zańǵa engizilgen. Depýtat bul balalardyń qazaq tilinde qyzyqty kontentke qol jetkizý múmkindigin keńeıtedi dep senedi.
«Máselen, «Balapan» telearnasynyń kontent jasaýshylarǵa tóleıtin qarajaty óte az bolǵandyqtan, olar tek qazaq tilin qoldaý maqsatynda jumys istep, kóbine volonter sıaqty áreket etedi. Sondyqtan, osy búdjet arqyly bólingen qosymsha qarajat qazaqsha kontenttiń sapasyn arttyrýǵa yqpal etedi dep senemiz», dedi ol.
Depýtat balalar arasynda qazaqsha kontentti tutyný boıynsha sapaly ǵylymı zertteý júrgizý qajettigine nazar aýdardy. Osyǵan baılanysty Ǵylym mınıstrligine tıisti usynys jasalǵan.
«Sonymen qatar, álemdik hıt múltfılmderdi de memlekettik tilge aýdaryp, YouTube-qa júkteý mańyzdy. Bul úshin avtorlyq quqyq ıelerimen aýqymdy jumys qajet. Ázirge bul másele tolyq sheshilgen joq, biraq aldaǵy ýaqytta osy baǵytta jumysty jalǵastyrýdy josparlap otyrmyz», dedi ol.