Juldyzdar aleıasy 2011 jyldyń kúzinde ashylǵan bolatyn.
Qazaq kıno juldyzdarynyń aleıasy 13 jańa esimmen tolyqty, dep habarlaıdy Almaty-akshamy.kz
Olardyń arasynda Halyq jazýshysy, Qazaqstannyń Eńbek Eri Oljas Súleımenov, qazaq kınosynyń ardageri, dybys operatory Qadyr Qosaı, aktrısa, Qazaqstannyń eńbek sińirgen ártisi Merýert Ótekesheva bar.
Eskertkish juldyzdar ómirden ótken ártister men eńbek sińirgen qaıratkerlerdi eske alý úshin jasaldy. Olardyń arasynda:
rejıser Satybaldy Narymbetov (08.03.1946 - 08.07.2021);
rejıser Igor Vovnánko (14.07.1942 - 10.10.2021);
akter Quman Tastanbekov (10.03.1945 - 17.12.2017);
akter Meńtaı Ótepbergenov (07.08.1946 - 05.01.2016);
akter Farhat Ábdiraıymov (21.01.1966 - 21.05.2021);
akter Jambyl Qudaıbergenov (17.05.1949 - 06.10.1990);
stýdıanyń bas ınjeneri Iýrıı Breýs (05.07.1911 - 18.11.1998);
alǵashqy qazaq kınooperatory Eskendir Tynyshpaev (09.05.1909 - 01.04.1995);
operator, rejıser Mark Berkovıch (30.01.1914 - 12.03.1986);
operator, rejıser Vácheslav Belálov (22.01.1936 - 04.10.2004).
«Ókinishke qaraı, qazaq kınosynyń negizin qalaýshylardyń kóbi aramyzda joq. Olardy eske alyp, umytpaýymyz kerek. Barshańyzdy osy aıtýly oqıǵamen quttyqtaımyn, bárińizge zor densaýlyq tileımin», - dedi Qazaqstannyń Eńbek Eri, KSRO Halyq ártisi Asanáli Áshimov.
«Qazaqfılm» kınostýdıasynyń prezıdenti Aqan Sataev Satybaldy Narymbetovtiń uldaryna Fransıadaǵy kınofestıval aıasynda berilgen «Otandyq kınematografıanyń damýyna úles qosqany úshin» syılyǵyn tabystady.
İs-sharaǵa kıno óneriniń damýyna úles qosqan tulǵalardyń týystary men jaqyndary, kórnekti mádenıet qaıratkerleri jáne kınostýdıa ujymy qatysty.