Almatyda kámeletke tolmaǵandar arasyndaǵy qūqyqbūzushylyqtardyń aldyn aluǵa baǵyttalǵan túngí profılaktıkalyq reıd óttí. Monıtorıng barysynda túngí uaqytta jasóspírímderdíń baruy múmkín kompyuterlík klubtarǵa erekshe nazar audaryldy. Būl turaly Almaty qalasynyń Jastar sayasaty basqarmasynyń ókílderí aıtty.
Monıtorıngtí qalalyq komyunıtı ortalyqtardyń rezıdentterí men qoǵam ókílderí Almaty qalasy Polıtsıya departamentímen bírlesíp ūıymdastyrdy. Ís-sharanyń maqsaty — kámeletke tolmaǵandardyń keshkí jáne túngí uaqytta qoǵamdyq oryndarda boluyn retteıtín zańnama talaptarynyń saqtaluyn baqylau, sondaı-aq jastar arasyndaǵy qūqyqbūzushylyqtardyń aldyn alu.
Reıd ayasynda Lord, BRO, Vernyi, DarkNet jáne ózge de kompyuterlík klubtar tekseríldí. Monıtorıng qorytyndysy boıynsha zańdy ókílsíz júrgen kámeletke tolmaǵandar anyqtalǵan joq.
«Reıd barysynda polıtsıya qyzmetkerlerí kompyuterlík klubtarda zańdy ókílsíz júrgen bírde-bír jasóspírímdí anyqtaǵan joq. Mūndaı faktíler tírkelgen jaǵdaıda kámeletke tolmaǵandar Almaty qalasynyń Áuezov audany Polıtsıya basqarmasyna jetkízílíp, ata-analary nemese qamqorshylary shaqyrylatyn edí. Al 22:00-den keıín jasóspírímderdíń boluyna jol bergen mekeme ıelerí ákímshílík jauapkershílíkke tartylady», — dedí Almaty qalasy Áuezov audany komyunıtı ortalyǵynyń dırektory Bauyrjan Mahanbet.
Sondaı-aq, ol kompyuterlík klubtarda, qoǵamdyq keńístíkterde jáne sauda-oıyn-sauyq ortalyqtarynda profılaktıkalyq reıdter aı saıyn, tūraqty túrde ótkízíletínín atap óttí.
«Ótken jylmen salystyrǵanda qańtar aıy oń kórsetkíshpen bastaldy, qūqyqbūzushylyq tírkelgen joq. Degenmen kámeletke tolmaǵandar men olardyń ata-analaryna nemese zańdy ókílderíne jauapkershílíktí únemí eske salu mańyzdy», — dedí ol.
Eske salaıyq, Qazaqstan Respublıkasynyń zańnamasyna sáıkes, kámeletke tolmaǵandarǵa 23:00-den 06:00-ge deıín zańdy ókílsíz tūrǵyn úıden tys jerde boluǵa tyıym salynady. Sondaı-aq, Qazaqstan Respublıkasynyń Ákímshílík qūqyqbūzushylyq turaly kodeksíníń 442-babyna sáıkes, 22:00-den 06:00-ge deıín oıyn-sauyq mekemelerínde kámeletke tolmaǵandardyń zańdy ókílsíz júruíne tyıym salynady.