Qazaqstan alǵash ret AQSH naryǵyna eksporttyq un jetkizýdi bastady.
Alǵashqy 50 tonna Eurasian Legacy brendimen shyǵarylǵan ónim Amazon, Walmart onlaın-dúkenderinde jáne Nú-Iork naýbaıhanalarynda satylymǵa shyqty.
Bul – AQSH-ta ulttyq taýarymyzdy satýdyń jańa strategıasy aıasynda júzege asqan alǵashqy iri eksporttyq joba. Aldaǵy ýaqytta QazTrade qoldaýymen aı saıynǵy jetkizilim kólemin 100 tonnadan asyrý kózdelip otyr. QazTrade – QR Saýda jáne ıntegrasıa mınıstrligi janyndaǵy eksportty damytýǵa jaýapty biryńǵaı operator.
Amazon-daǵy qazaq unynyń baǵasy – 1,36 keli qaptamasy úshin $14,50. Qaptamada «Product of Kazakhstan» degen belgi bar. Bul belgi «Qazaqstanda jasalǵan» brendiniń tanymaldyǵyn arttyryp, ekologıalyq taza ári sapaly ónim jetkizýshi el retinde ımıjimizdi qalyptastyrady.
Onlaın saýdadan bólek, qazir qazaqstandyq undy meıramhanalarǵa, kofehanalarǵa jáne jergilikti asqanalarǵa jetkizý jóninde kelissózder júrgizilýde. Sonymen birge, AQSH-tyń iri saýda jelileri – Costco, Whole Foods jáne Trader Joe’s dúkenderine shyǵý múmkindigi de qarastyrylyp jatyr.
«Biz unmen ǵana toqtap qalmaımyz. Qaraqumyq, granola, talqan, shokolad pen kakaony da tanystyrdyq. Nú-Iork, Chıkago jáne Vashıngtondaǵy seriktesterimiz bul ónimderdiń sapasyn kórdi. Amerıkanyń naryǵyna shyǵý shilde aıynda Vashıngtonda QazTrade keńsesi ashylǵannan keıin múmkin boldy. Nátıjesinde dıstrıbútorlar men rıteılermen tikeleı jumys isteýge jol ashyldy. Endi osy qalalarda qazaqstandyq óndirýshilerdiń bıznes-mıssıasyn ótkizgen durys bolady dep otyrmyz. Bul seriktestermen baılanysty nyǵaıtyp qana qoımaı, tabıǵı ónimderdi joǵary baǵalaıtyn HoReCa segmentine shyǵýǵa múmkindik beredi», – dedi QazTrade bas dırektory Aıtmuhammed Aldajarov.