Ulttyq ulannyń Almatydaǵy Keńes Odaǵynyń batyry, gvardıa polkovnıgi Baýyrjan Momyshuly atyndaǵy 5571 áskerı bóliminiń jeke quramy «Qazaq tıtany» atanyp ketken sportshy, faıter, KINES rekordtar kitabynyń úsh dúrkin rekordshysy Almat Jumanovpen kezdesti.
Sarbazdardyń aqyn-jazýshylar, sporttaǵy chempıondar, ár saladaǵy óner adamdarymen kezdesýi dástúrge aınalǵan deýge bolady. Áskerdiń oń beınesin qalyptastyryp, áskerı qyzmettiń abyroıyn arttyra túsýge, keıingi býyn jastardy Otandy súıý, qadirleý, ony qorǵaý úshin daıyn bolýǵa tárbıeleýde sport ókilderiniń de yqpaly zor ekeni sózsiz.
Búgin de osyndaı jarqyn júzdesýdiń birinde áskerı qyzmetshiler men Qazaq tıtanynyń arasynda qyzyqty suhbat boldy. Almat Jumanov – halyqaralyq dárejede oıyn kórsetip júrgen sportshy. Ol – eń aldymen gennen berilgen tabıǵı zor kúshtiń ıesi. Onyń tanymaldylyǵy rekord jasaǵan saıyn arta tústi. Almatty Qazaqstan ǵana emes, shetelderde de tanyp, onyń erekshe qasıeti álemge áıgili bolyp keledi.
Qajymuqannyń búgingi izbasarymen júzbe-júz kezdesý áskerı qyzmetshiler úshin erekshe jaǵdaı boldy.
«Men de Ulttyq ulan qatarynda bolǵan keshegi sarbazbyn. 2015 jyly Temirtaý qalasyndaǵy 5516 áskerı bólimine merzimdik qyzmetke shaqyrylyp, Otan aldyndaǵy boryshymdy ótkerdim. Áskerı qyzmetti óteý – ár er-azamattyń mindeti. Mindetterińe adal bolyńdar, qajymas qaırat, sarqylmas kúsh-qýat tileımin», – dep bastady áńgimesin Almat Jumanov. Budan keıin sportshy rekordtary týraly aıtyp berdi.
Birinshi rekordynda 109 tonnalyq vagondy belge belbeý taǵyp, 8,5 metrge deıin súıregen, ekinshisinde eki jasar túıeni ıyǵyna salyp, bir ýaqytta arqanmen úsh jeńil kólikti júrgizýshilermen birge 13 metrge deıin súıregen. Jalpy salmaq 4800 kg quraǵan. Úshinshi rekordynda AN-72 áskerı ushaǵyn 1 metrge súıregen.
Qazirgi ýaqytta Almat sporttaǵy baǵytyn ózgertip, kásipqoı boksqa túbegeıli bet burdy. Nátıjesi de jaman emes. 2024 jyldyń 17 jeltoqsanynda kásipqoı bokstyń UBC CONTINENTAL nusqasy boıynsha Latyn Amerıkasynyń chempıondyq belbeýin jeńip aldy.
Kesh sońynda 5571 áskerı bólimi komandıriniń tárbıe jáne áleýmettik-quqyqtyq jumystar jónindegi orynbasary podpolkovnık Ulyqbek Qaraev «Ońtústik» óńirlik qolbasshylyǵy atynan Almat Jumanovqa jastarǵa áskerı-patrıottyq tárbıe berý isine qosyp jatqan úlesi úshin «Alǵys hat» tabystady.