Almatydaǵy respýblıkalyq Dostyq úıinde «Qazaq tili» klýby bar.
Atalǵan klýb 2021 jyldyń qazanynan beri jumys istep keledi, dep habarlaıdy Almaty-akshamy.kz.
«Qazaq tili» klýbyna qatysýshylarǵa Oksana Nábıeva esimdi jas maman sabaq beredi. Qazaq tilin jetik meńgergen Oksananyń jasy 26-da. Jas ta bolsa, ol 108 sabaqtan turatyn óziniń jeke avtorlyq ádistemesin jasap úlgergen. Búginde sol baǵdarlamasynyń negizinde ózgelerge sabaq berip júrgen jaıy bar. Ádisteme avtory avtorlyq ádistemesinde etnos ókilderi men barsha qazaq tilin úırenemin deýshilerge kúndelikti qoldanystaǵy qarapaıym tildi úıretýdi kózgeıdi. Qazirgi tańda onyń aldynan 241 adam oflaın jáne onlaın formatta qazaq tilin úırenip júr.
Til janashyry Oksananyń aıtýynsha, búginde qazaqshasyn jetildirip, ony úırenemin deýshiler tarapynan qyzyǵýshylyq artyp keledi. Til úırenýge talpynysta oń dınamıka bar. Bir jyldan beri osy isti qolǵa alǵan Oksananyń negizgi mamandyǵy - qazaq tilinen orys tiline jáne kerisinshe orys tilinen qazaq tiline ilespe aýdarmashy. Mektep jasynan bastap, qazaq tiline den qoıǵan jas maman «qazaqshany úırenýge qulqy joqtarǵa» nıet bolsa, bári múmkin ekenin aıtady.
«Tildi meńgeremin, úırenemin degen adam kez kelgen jerden múmkindik taýyp, oqýǵa bolady. Aqparat az, kýrs joq, kitap joq degen sózderdiń bári – jaı ǵana syltaý. Sebebi qazirgi 21-ǵasyrda múmkindikter óte kóp. Sol sebepti tek oqý kerek», - deıdi Oksana Nábıeva.
Oksananyń aıtýynsha, qazir qazaq tili qajettilikten buryn, sánge aınalǵan. Osyny eskergen ol áleýmettik jelidegi paraqshasynda da avtorlyq kontentke mán bergen. Iaǵnı onda ol qazaq tilindegi hıt ánderdiń maǵynasyn túsindirip, kúndelikti ómirdegi jaıttarǵa sózdik qoldanystardy qazirgi zamannyń suranysyna saı qysqa da nusqa etip, oqyrmandaryna usynyp júr.
Oksana Nábıevanyń aıtýynsha, kýrsty bitirgender A-2 deńgeıin meńgerip shyǵady. Iaǵnı kúndelikti ómirge qajetti tildik normalardy úırenip, erkin sóıleı alady. Ótken jyly kýrsty 748 adam oqyp shyqqan.