Qasym-Jomart Toqaevqa Arnaýly ókil Izabel Dúmon Fransıa Prezıdenti Emmanúel Makronnyń hatyn tabys etti.
Qasym-Jomart Toqaev Izabel Dúmonǵa iltıpat bildire otyryp, joldaǵan ıgi sálemi úshin Prezıdent Emmanúel Makronǵa alǵys aıtty. Sondaı-aq Fransıa Qazaqstannyń Eýropadaǵy basty saıası jáne ekonomıkalyq seriktesteriniń biri ekenin atap ótti, dep habarlaıdy Almaty-akshamy.kz Aqordanyń resmı saıtyna silteme jasap.
Kezdesý barysynda joǵary deńgeıde qol jetkizilgen ýaǵdalastyqtardy júzege asyrýǵa baǵyttalǵan ekijaqty qatynastardy odan ári nyǵaıtý perspektıvalary talqylandy.
«Ótken jyly 29 qarashada Fransıa Prezıdentimen ótken kezdesýden úlken áser aldym. Biz 2 saǵattan astam ýaqyt betpe-bet formatynda ekijaqty qatynastar men elderimiz arasyndaǵy yntymaqtastyqtyń ózekti máseleleri jóninde áńgimelestik. Sondaı-aq halyqaralyq arenada qalyptasqan ahýal týraly pikir almastyq. Fransıa – Qazaqstannyń jetekshi saıası jáne ekonomıkalyq seriktesteriniń biri. Biz eki el arasyndaǵy yntymaqtastyqty, sizdiń elińizdiń halyqaralyq arenadaǵy rólin jáne Fransıanyń ekonomıkalyq áleýetin joǵary baǵalaımyz. Sizdiń elińiz 2008 jylǵy maýsymda Eýropalyq Odaqqa múshe memleketterdiń arasynda birinshi bolyp Qazaqstanmen strategıalyq seriktestik týraly shartqa qol qoıdy. Bıyl biz osy mańyzdy qujattyń on bes jyldyǵyn atap ótemiz. Elderimiz arasynda barlyq deńgeıde belsendi jáne senimdi saıası dıalog ornaǵanyn taǵy da atap ótkim keledi», – dedi Memleket basshysy.
Qasym-Jomart Toqaev eki el arasyndaǵy saýda-ekonomıkalyq, mádenı-gýmanıtarlyq baılanystardyń qarqyndy damyp kele jatqanyna joǵary baǵa berdi. Onyń aıtýynsha, Qazaqstan – Fransıanyń Ortalyq Azıadaǵy basty saýda seriktesi. Memleket basshysy Prezıdent Emmanúel Makronǵa júrekjardy sálemin joldady jáne ony Qazaqstanǵa saparmen kelýge shaqyrdy.
«Bul sapar ekonomıkalyq jáne saıası yntymaqtastyqqa tyń serpin beredi dep oılaımyn. Eki el arasynda iske asyrýdy qajet etetin kóptegen ýaǵdalastyq bar. Qazaqstanda fransýz kapıtalynyń úlesi bar 170 kásiporyn jumys isteıdi jáne jetekshi fransýz kompanıalary qyzmet etedi. Bizdiń ekonomıkamyzdaǵy fransýz kompanıalarynyń qyzmetine jan jaqty qoldaý kórsetiledi», – dedi Prezıdent.
Óz kezeginde Izabel Dúmon Fransıanyń Qazaqstanmen qarym-qatynasty damytýǵa múddeli ekenin jetkizdi. Onyń aıtýynsha, Fransıa Qazaqstan Prezıdentiniń júrgizip jatqan reformalar saıasatyn tolyq qoldaıdy. Fransıa Prezıdentiniń Arnaýly ókili Qazaqstannyń álemdegi qazirgi kúrdeli geosaıası jaǵdaıǵa qatysty ustanymyna joǵary baǵa berdi.
«Sizge Prezıdentimniń sálemin jetkizgim keledi. Byltyr qarasha aıynyń sońynda Parıjdegi kezdesýińiz týraly onyń óte jaqsy pikirde ekenin bilemin. Bul – biz úshin óte mańyzdy sát jáne Sizden aımaqta ne bolyp jatqany týraly kózqarasyńyzdy estý mańyzdy. Sizdiń saparyńyz eki el arasyndaǵy yntymaqtastyqqa tyń serpin berdi. Biz bul yntymaqtastyqty strategıalyq seriktestigimiz negizinde jalǵastyrǵymyz keledi. Bul biz úshin de óte mańyzdy», – dedi Izabel Dúmon.
Sondaı-aq olar halyqaralyq jáne aımaqtyq kún tártibindegi ózekti máseleler boıynsha pikir almasty.