Ótken jylmen salystyrǵanda qoldan aqsha jasaýshylar sany azaıǵan.
Osy jyldyń alty aıynda Qazaqstanda 1 mln teńgeden astam somaǵa qoldan jasalǵan 336 aqsha belgisi anyqtalǵan, dep habarlaıdy Almaty-akshamy.kz.
Mamandardyń aıtýynsha, byltyr osy ýaqytta osyndaı 390 banknot aınalymnan alynǵan bolatyn.
«Qoldan aqsha jasaýshylar kóp jaǵdaıda 2 000 jáne 5 000 teńgelik kýpúralardy jasaıdy. Bul kýpúralardyń jalpy úlesi 65% jáne 19% quraıdy. Qalǵan 16%-y basqa nomınaldaǵy banknottar men monetalarǵa tıesili», – delingen Ulttyq bank baspasóz qyzmetiniń habarlamasynda.
Ulttyq bank mamandarynyń aıtýynsha, jalǵan aqshalardyń kóp bóligi Almaty (228) men Nur-Sultanda (43) anyqtaldy.
«Qoldan aqsha jasaýshylar negizinen vızýaldy qorǵanysh elementterin ımıtasıalaıdy. Bir qaraǵanda, olar shyn aqsha sıaqty bolýy múmkin, biraq banknotty muqıat zerdelep kórgen kezde qoldan jasalǵanyn anyqtaı alasyz. Túpnusqa banknottar aıqyn beınelerimen erekshelenedi, ańyzdaǵy Samuryq qusy túrindegi sý belgisi, nomınaly, sondaı-aq jaryq túsirgen kezde anyq kórinetin qorǵanysh jibi bar», – deıdi QR UB qolma-qol aqsha aınalysy departamenti banknottar men monetalardy saraptaý basqarmasynyń basshysy Asqat Muqamadıev.