Dımash ónerimen tánti etti.
«Vıtebskidegi Slaván bazary» XXX halyqaralyq óner festıvaliniń ashylýy 15 shildede qalanyń basty alańy – jazǵy amfıteatrda ótti, dep habarlaıdy Almaty-akshamy.kz 24.kz-ke silteme jasap.
Bul mádenı sharada Dımash Qudaıbergen «Lúbov pohojaıa na son» jáne «Be With Me» ánderin jandy daýysta oryndap, kórermenderdi qýantty, dep jazdy dimashnews.com.
Festıváldiń ashylý saltanatynda Belarýs Prezıdenti Aleksandr Lýkashenko sóz sóıledi.
«Búgingi Vıtebskidegi festıvál – bul kásibı vokaldyq sheberliktiń bedeldi halyqaralyq baıqaýy. Bul sahna Taısıa Povalıı, Rýslana, Petr Elfımov, Alena Lanskaıa, Dımash Qudaıbergen jáne basqa da kóptegen tanymal ártisterdiń jarqyn mansabyna bastaý boldy», – dep atap ótti.
Álemniń túrli elderiniń tanymal ártisteri men ujymdary aýqymdy halyqaralyq is-sharaǵa qatysty. Qonaqjaı amfıteatr zaly 7 myń qonaq qabyldady. Konsert kezinde kórermender ártisterdiń usynǵan túrli stılderi men janrlardyń keremet úılesimin tańdanyspen qabyldady: klasıkalyq, halyqtyq, estradalyq mýzyka Vıtebsk sahnasynda shyrqalyp, shyǵarmashylyqtyń shekarasy men qashyqtyǵy joq ekenin kórsetti. Horeografıalyq, sırk, sport ujymdarynyń óner kórsetýi merekeniń serpindi atmosferasyn jandandyrdy.
«Vıtebskidegi Slaván bazary» XXX halyqaralyq óner festıvaliniń saltanatty ashylý rásimine «Slaván bazary 2015» jeńimpazy, osy sharaǵa shaqyrylǵan qonaq jáne estradalyq ánder baıqaýyndaǵy qazylar alqasynyń múshesi Dımash Qudaıbergen qatysty. Onyń oryndaýynda konserttiń fınalynda eki kompozısıa shyrqaldy – bireýi orys tilinde, ekinshisi qazaq jáne aǵylshyn tilderinde. Kompozıtor Igor Krýtoı men aqyn Valerıa Gorbachevanyń jaýhary – «Lúbov pohojaıa na son» lırıkalyq áni kórermenderdi jaǵymdy nostalgıaǵa boı aldyrdy.
Festıválge ártúrli qalalar men elderden kelgen Dears alǵashqy nómirden keıin sahnaǵa ártis úshin gúl shoqtaryn ákeldi. «Qymbattylarym, súıikti tyńdarmandarym! Búgin sizderdi kórgenime óte qýanyshtymyn. Dál osy jerde osydan týra 6 jyl buryn men eresek shyǵarmashylyq ómirge joldama aldym», – dep Dımash kórermendermen amandasty. Ártis kórermenge óziniń ata-anasyn tanystyryp, jankúıerlerimen birge anasy Svetlana Aıtbaevany týǵan kúnimen quttyqtady. «Sensasıa» shoý-baletiniń súıemeldeýimen ártis oryndaǵan ekinshi kompozısıa ánshi jáne kompozıtor Dımashty múldem basqa qyrynan kórsetti.
Be With Me kórermender zaly men shoýdy tikeleı efırde kórip otyrǵan onlaın-aýdıtorıany qýattandyrý boldy. Dımash konserttiń sońynda kórermender zalyna túsip, tyńdarmandarymen birge án shyrqady.