Qazaqstandyq jas ǵalym Merýert Bıjanova álemniń eń úzdik joǵary oqý oryndarynyń biri sanalatyn — Ulybrıtanıadaǵy Oksford ýnıversıtetiniń doktorantýra baǵdarlamasyna qabyldandy, dep habarlaıdy aqshamnews.kz
2025 jylǵy halyqaralyq ýnıversıtetter reıtıńinde Oksford álemdik TOP-1 oryndy ıelenip otyr. Ǵylym men bilimniń altyn ordasyna aınalǵan bul oqý ordasy — áıgili Stıven Hokıng bilim alǵan, Nobel syılyǵynyń laýreattary, álemdik deńgeıdegi saıasatkerler men oıshyldar túlep ushqan bedeldi mekeme.
— Bilim alýdy ǵylym men ıdeıalar toǵysqan ortada jalǵastyramyn. Bul — úlken múmkindik ári zor jaýapkershilik. Oksfordta oqý — men úshin arman ǵana emes, el aldyndaǵy mindetim dep bilemin, — deıdi Merýert.
Merýert Bıjanova — óz salasynda tereń bilim men tájirıbe jınaqtap, ǵylymı zertteýlerge belsene aralasyp júrgen jas maman. Onyń halyqaralyq deńgeıdegi bilim ordasyna túsýi — qazaqstandyq jastardyń áleýeti zor ekenin taǵy bir dáleldeıtin qýanyshty jańalyq.
Bul jetistik óz bilim jolyn endi bastaǵan jas urpaqqa jiger berip, álemdik arenada qazaqstandyq ǵylym men bilimniń bıikke kóterilýine serpin bolmaq.