Rekonstrýksıalyq jumystardan keıin bekettiń ótkizý qabileti 4 esege artady
Jambyl oblysynyń Qordaı aýylynda QR Parlamenti Májilisi men Qyrǵyz Respýblıkasy Jogorký Kenesh depýtattarynyń kezdesýi ótti, dep habarlaıdy Almaty-akshamy.kz QR IIDM baspasóz qyzmetine silteme jasap.
Depýtattar aımaqtaǵy transport áleýetin damytý boıynsha eki el arasyndaǵy birlesken is-qımyldar barysyn talqylady. Sondaı-aq basqosýǵa QR IIDM Avtomobıl joldary komıtetiniń tóraǵasy Tólegen Abdýllın de qatysty.
Qazaq-qyrǵyz shekarasynda 8 ótkizý beketi bar. Olardy 2025 jylǵa deıin qaıta jańǵyrtý kózdelip otyr. Kezdesý barysynda depýtattar "Qordaı" jáne "Qarasý" ótkizý beketterine bardy. Osy rette aıta keterligi, "Qordaı" beketin rekonstrýksıalaý jumystary ótken jyldyń naýryz aıynda aıaqtalǵan bolatyn.
Jańartylǵan pýnkt jańa quraldarmen, onyń ishinde "Rapıskan" ınspeksıalyq-tekserý keshenimen jabdyqtalǵan. Avtokólikterge arnalǵan qozǵalys jolaǵynyń sany 4-ten 8-ge deıin artty. Sonymen qatar ótkizý beketindegi pasporttyq baqylaý kabınasynyń sany 34-ke kóbeıdi. Buǵan deıin olardyń sany 13 bolatyn.
Rekonstrýksıalyq jumystardan keıin bekettiń ótkizý qabileti 4 esege ıaǵnı, 6 myńnan 25 myń adamǵa deıin artqan. Al kólikter aǵyny 2 jarym esege ulǵaıǵan. Bekettiń jańǵyrtylýy elder arasyndaǵy saýda-ekonomıkalyq yntymaqtastyqty arttyrýda mýltıplıkatıvtik áserin tıgizbek.
Sondaı-aq jańartý jumystary aldaǵy ýaqytta "Qarasý" jáne "Besaǵash" shekaralyq beketterinde de júrgizilmek. Ózge 5 pýnktti modernızasıalaý jumystary kezeń-kezeńimen iske asyrylmaq.
Aımaqqa sapar barysynda depýtattar "Qarasý" jáne "Ak-Tılek" ótkizý beketteri arasyndaǵy kópir qurylysynyń barysymen de tanysty. Nysan qurylysy 2019 jylǵy jańa kópir salý jáne qoldanystaǵy kópirdi rekonstrýksıalaý boıynsha birlesken is-qımyl týraly Úkimetaralyq kelisim negizinde júzege asýda.
Kópirdiń jobalyq-smetalyq qujattamasy 2020 jyly ázirlenip, qurylys-montajdaý jumystary 2021 jyly bastaldy. Kópir bıylǵy jyldyń aıaǵyna deıin paıdalanýǵa berilmek.
Kezdesý nátıjesi boıynsha Qazaqstan men Qyrǵyzstan ókilderi avtokólik joldary salasynda yntymaqtastyqty odan ármen arttyrý týraly ózara kelisimderge qol qoıdy. Taraptar ózderine júktelgen mindettemelerdi ýaqtyly ári sapaly júzege asyrýǵa ýaǵdalasty.