Pýsan - Ońtústik Koreıanyń ekinshi iri qalasy
Pýsan qalasynda Qazaqstan Respýblıkasynyń Bas konsýldyǵynyń saltanatty ashylý rásimi ótti. Qazaqstan Elshisi Baqyt Dúısenbaev quttyqtaý sózinde Bas konsýldyqtyń ashylýyna atsalysqany úshin Koreıa Respýblıkasynyń Úkimetine, Syrtqy ister mınıstrligine jáne Pýsan qalasynyń ákimshiligine erekshe alǵysyn bildirdi, dep habarlaıdy Almaty-akshamy.kz SİM baspasóz qyzmetine silteme jasap.
B. Dúısenbaev Qazaqstan Bas konsýldyǵynyń ashylýy eki eldiń arasyndaǵy dıplomatıalyq qatynastardyń ornaǵanyna 30 jyl tolýymen tuspa-tus kelgen tarıhı oqıǵa ekenin atap ótti.
Ashylý saltanatynda Pýsandaǵy QR Bas konsýly Aıan Qashabaev sóz sóılep, Bas konsýldyqtyń ekijaqty yntymaqtastyqty jandandyrý, sondaı-aq Qazaqstan azamattarynyń zańdy quqyqtary men múddelerin qorǵaý úshin barlyq kúsh-jigerin salatynyn atap ótti.
İs-sharaǵa Koreıa Respýblıkasy Syrtqy ister mınıstrliginiń, Pýsan qalasy merıasynyń, dıplomatıalyq korpýstyń, iskerlik toptardyń, jurtshylyq pen BAQ ókilderi qatysty.
Pýsan - Ońtústik Koreıanyń ekinshi iri qalasy jáne Soltústik-SHyǵys Azıadaǵy eń úlken port jáne halyqaralyq qarjy ortalyǵy. Pýsan aýmaǵynda 51 sheteldik dıplomatıalyq ókildikter ashyldy, olardyń ishinde 6 konsýldyq, 5 mádenı ortalyq, BUU-nyń 2 mekemesi, 1 saýda ókildigi jáne 37 qurmetti konsýldyqtar bar.