Mádenı sharany Qazaqstannyń osy memlekettegi elshiligi men jastar qaýymdastyǵy birigip uıymdastyrdy.
Stokgolmdegi kıno úıine jınalǵandar rejıser Aqan Sataevtyń «Uly dala tańy» týyndysyn tamashalady, dep habarlaıdy Almaty-akshamy.kz.
Fılmde Qasym hannyń ómiri, bılik qurǵan kezeńi men Qazaq handyǵynyń nyǵaıýy jolyndaǵy kúres týraly baıandalady. Eki saǵattyq týyndyny shvedter tapjylmaı otyryp kórdi. Táýelsizdiktiń qundylyǵyn qasterleýge dáripteıtin tarıhı dramaǵa kópshilik joǵary baǵa berdi.
«Fılm keremet túsirilgen. Týyndydan qazaq halqynyń óz eline degen maqtanysh sezimin, Táýelsizdik jolynda qandaı qıyndyqty bastan keshkenin kórdik. Ǵajap», - dedi kórermen Annelı Anderson.
«Bul - Qazaqstandy álemge tanytýǵa laıyqty fılm. Qazaqtyń tarıhy, turmysy, minezi, salt-dástúrinen habar beretin fılm. Keremet kostúmderdi jasaýǵa qyrýar ter tógilgeni kórinip tur. Taspagerdiń de jumysy tamasha», - dedi kınotanýshy Sabına Iskanderlı.