Medet Serik Heart Signal jobasynda mahabbatyn izdeýde
Búginde Qytaıdyń jetekshi IT kompanıalarynyń birinde konsýltant bolyp jumys isteıtin Medet Serik 2024 jyly Qytaıdyń eń tanymal romantıkalyq realıtı-shoýy – Heart Signal-ǵa qatysýshy atandy. 11 jyldan beri Shenchjende turatyn Medet joǵary tehnologıalar salasynda tabysty mansap quryp, Fortune 500 kompanıalarynyń basshylarymen jumys isteý strategıalaryn ázirleýmen aınalysady. Onyń basty mindeti – iri korporasıalardyń sıfrlyq transformasıasyna sheshimder tabý jáne olardy tıimdiligin joǵary deńgeıde túsindirý.
Joldyń basy – kezdeısoq shaqyrtý
Medet bul joba týraly burynnan biletin, biraq fanaty bolmaǵan. Shoýdyń tanymaldylyǵy onyń nazaryn tek tildi jetildirý úshin keıde epızodtaryn kórýge ıtermelegen. Alaıda barlyǵy kútpegen jerden bastaldy: Medet Qytaıdyń Little Red Book áleýmettik jelisine tirkelip, birneshe jazba jarıalaǵannan keıin, Heart Signal-dyń uıymdastyrýshylary oǵan habarlasyp, shoýǵa qatysýǵa shaqyrady. Bastapqyda Medet bul usynysty elemeı, alaıaqtyq dep oılaǵan. Biraq qaıtalap kelgen shaqyrtý ony sendirip, kezdesýge apardy.
— Uıymdastyrýshylarmen alǵash kezdesken kezde, túsirilim tobynyń jumysyn kórip, usynystyń shynaıy ekenin túsindim. Olar menen suhbat alý úshin eki saǵat boıy túrli suraq qoıdy: ómirbaıannan bastap, mahabbat pen armanǵa deıin. Birneshe irikteý kezeńinen ótkennen keıin, meniń kastıngten ótip, jobaǵa qatysýshy bolǵanymdy habarlady, — deıdi Medet.
Heart Signal-daǵy alǵashqy qazaq
Heart Signal jobasy – alty jigit pen alty qyz bir aı boıy birge turyp, mahabbattaryn tabýǵa tyrysatyn realıtı-shoý. 2024 jyly Medet bul jobaǵa qatysqan alǵashqy sheteldik boldy. Onyń aıtýynsha, jobaǵa qatysý ońaı bolmaǵan, óıtkeni mádenı jáne tildik aıyrmashylyqtar onyń aldynda úlken kedergi bolyp kóringen.
— Maǵan basqa qatysýshylarmen salystyrǵanda ózimdi eki ese kóbirek dáleldeýge týra keldi. Olar meniń qazaq ekenimdi, mádenıetimdi jáne qundylyqtarymdy túsinýge qyzyǵýshylyq tanytty. Men úshin bul úlken jaýapkershilik boldy, — dep eske alady ol.
"Men seni jaqsy kóremin" – Qytaıda hıtke aınaldy
Medettiń jobaǵa qatysýy tek onyń jeke ómiri úshin ǵana emes, qazaq mádenıetin tanymal etý úshin de paıdaly boldy. Bir epızodta ol qazaq tilinde "Men seni súıemin" frazasynyń týra aýdarmasy joq ekenin, onyń ornyna "Men seni jaqsy kóremin" tirkesi bar ekenin aıtqan. Sebebi, ulttyq mentalıtetke saı kelmeıtinin túsindirgen. Bul sóz Qytaıda úlken rezonans týdyryp, áleýmettik jelilerde "Men seni jaqsy kóremin" tanymal heshtegke aınaldy. Qytaılyq tanymal ánshilerdiń biri tipti bul tirkesti sahnada aıtty.
Qazaqstan mádenıetiniń elshisi
Medet jobada Qazaqstan týraly da áńgimelep, Almatynyń taýlary men Shymbulaqtyń erekshelikteri týraly aıtyp berdi. Osydan keıin keıbir qytaılyq jankúıerler Almatyǵa baryp, sol taýlardy óz kózderimen kórip qaıtqan.
— Joba barysynda men elim týraly aıtýǵa múmkindik alǵanyma qýanyshtymyn. Men úshin bul tek jeke tájirıbe emes, Qazaqstandy álemge tanytýdyń da tamasha tásili boldy, — deıdi Medet.
Jeke ómir qupıasy
Jobadaǵy juby týraly suraqqa Medet jaýap berýden bas tartty. Sebebi, shoý áli kúnge deıin tanymal bolyp, jańa kórermender jınap jatqandyqtan, bul qupıany saqtaý mańyzdy ekenin aıtty. Biraq bir nárse anyq: Medet Serik Qytaıdyń eń tanymal realıtı-shoýlarynyń birinde ózindik erekshe orny bar tulǵaǵa aınaldy.