Almatydaǵy A.Chehov atyndaǵy Ortalyq qalalyq kitaphanada «Jeltoqsan oqıǵasy – Táýelsizdik bastaýy» atty ádebı-tanymdyq kesh ótti. Bul keshtiń maqsaty – Jeltoqsan oqıǵasynyń tarıhı mańyzyn jastarǵa túsindirý, batyrlardyń erligin eske alyp, olardyń rýhyna taǵzym etý, sondaı-aq, jas urpaqty patrıottyq rýhta tárbıeleý.
Keshke elimizdiń táýelsizdigi úshin kúresken Jeltoqsan oqıǵasynyń qaharmandary shaqyryldy. Toqtaǵan Bákıev, Júrsin Tastekeev jáne Bekbolat Núkejanov sol kúngi aýyr sátteri týraly áńgimeledi.
İs-sharaǵa qaladaǵy №15 jáne №147 gımnazıa oqýshylary men Márzıa Turlyhanova atyndaǵy gımnazıanyń oqýshylary belsene qatysty. Jas órender Jeltoqsan rýhyn dáripteıtin qoıylymdar qoıyp, áserli óleńder oqydy. Ásirese, №15 gımnazıanyń oqýshylary daıyndaǵan kórkem sahnalyq qoıylym Jeltoqsan oqıǵasynyń sol bir tarıhı sátterin kórermenge jetkizip, kóńilderdi tolqytqan syndy. №147 gımnazıanyń oqýshysy Káýsar Aıdarbaı Serik Ákiramulynyń «Táýelsiz elim» óleńin naqyshyna keltire oryndady.
İs-shara barysynda Jeltoqsan qaharmandarynyń erligi ǵana emes, sol kezeńdegi qazaq halqynyń birligi, erik-jigeri men azattyqqa degen umtylysy, elge, jerge degen súıispenshilik sezimderi áserli áńgimelendi. Keshtiń árbir sáti ulttyq rýhty kóterip otyrǵandaı áserde boldy. Eń bastysy, bul keshte Táýelsiz eldiń búgingi urpaqtary, jetkinshekterdiń kóp qatysqany qýantty bizdi. Egemen eldiń erteńi – sol órenderdiń qolynda.