Maııa Manezanyń esimi Qazaqstan tarıhynda erekshe atalady. Aýyr atletıka salasyndaǵy aıtýly ziltemirshilerdiń biri, London – 2012 Olımpıadasynyń chempıony. Ol synaqqa toly joldardan ótip, jeńiske toly jyldardyń kýási boldy. Sporttaǵy mansabyn sátti aıaqtaǵan «tolaǵaı qyz» búginde ómirdiń jańa betin ashty.
– Maııa Salaharqyzy, eń aldymen sizdi kóktem merekesimen quttyqtaımyz! Osynaý ádemi kúni siz kimge rızashylyǵyńyzdy bildirer edińiz?
– Árıne, men eń aldymen Qazaqstan syndy alyp el men onyń darhan peıildi halqyna sheksiz rızashylyǵymdy bildirer edim. Bul el qazir meniń týǵan úıime aınaldy. Meniń armanymnyń júzege asýyna múmkindik berdi. Meniń ómirimde kezdesken eń qıyn sátte de qoldaý kórsetti. Men bul qoldaýdy kásibı sporttaǵy alǵashqy qadamymnan bastap, olımpıadalyq tuǵyrǵa kóterilgenge deıin sezindim. Áli de sezinip kelemin. Qazaqstan myqty bolýǵa, ózime senýge jáne eshqashan jeńilmeýge úıretti. Eger maǵan senim bildirmese, kóp nársege qol jetkize almas pa edim, kim bilsin?
Marqum joldasym Vácheslav Ershov meniń jattyqtyrýshym ǵana emes, meniń ómirdegi arqasúıerim boldy. Ol sporttan keıin de ómir baryn, qalaı ómir súrý kerek ekenin úıretip ketti. Árıne, men ony árkez súıispenshilikpen eske alyp otyramyn. Átteń, eger qasymda qazir bolsa erekshe alǵys aıtar edim. Sonymen qatar, meniń jattyqtyrýshylaryma, meni qataıtyp, qıyndyqtardy jeńýge kómektesken jandarǵa, meniń otbasyma súıispenshiligim sheksiz.
Osynaý 30 jyl boıy bizdi biriktirip kele jatqan, úlken shańyraq Qazaqstan halqy Assambleıasyna rızamyn. Men árqashan osynaý beıbit elde tatý-tátti ómir súrip jatqanymyzdy maqtanyshpen aıtyp otyramyn.
Meniń artymda senim artqan elim turdy
– Sportta siz úshin komandanyń nemese jattyqtyrýshynyń sózi sheshýshi sát bolǵan kezi boldy ma?
– Iá, mundaı sátter kóp boldy. Keıde siz fızıkalyq turǵydan daıyn bolsańyz da, ishteı qorqynysh bolady. Mine, sol kezde jattyqtyrýshynyń bir aýyz sózi men komandanyń qoldaýy bárin ózgerte alady. Máselen, platformaǵa shyqpaı turyp qoldarym dirildegen sátter áli kúnge esimde. Sondaı sátte meniń jattyqtyrýshymnyń «bul seniń qolyńnan keledi nemese sen qolyńnan kelgenniń bárin jasadyń» degen bir aýyz sózi maǵan jetip jatty. Óıtkeni, meniń artymda maǵan senim artqan elim men komandam turdy.
– London – 2012 Olımpıadasy sizdiń mansabyńyzdyń sharyqtaý shegi boldy. Qazir sol kúndi eske alasyz ba?
– Árıne, bul kún meniń júregimde máńgige qaldy. Alǵashynda Olımpıada chempıony bolǵanyma senbeı, ári-sári kúıde turǵanym ras. Óıtkeni, bul Qazaqstannyń jeńisi. Árbir sportshy úshin óz eliniń týyn tuǵyrdyń eń bıik satysynda turyp kótergen sát mańyzdy. Mine, sol joly men de sondaı baqytty sátti basymnan keshtim.
– Sizdiń sporttyq jolyńyz ońaı bolǵan joq. Qıyn sátte sporttan bas tartqyńyz kelgen kez boldy ma? Sizge kim, ne kómektesti?
– Eń aldymen, ózine degen senim, sosyn óz elińe jáne halqyna degen senim der edim. Qıyn sátte Qazaqstan atynan qatysatynymdy esime túsirdim. Meniń bas tartýǵa quqyǵym joq ekenin bildim. Óıtkeni, maǵan senim artqan otbasym, meniń halqym tur.
Qazaqstan meniń boıymdaǵy kúres rýhyn oıatty
– Jalpy, sportshylar jeńilistiń ózinen kóp nárse úırenýge bolady dep jıi aıtady. Sizdiń synaqtan sabaq alǵan kezińiz boldy ma?
– Árıne, jeńilisterden de, jeńisterden de kóp nárse úırenýge bolady. Men úshin eń mańyzdy sabaq qandaı deısiz ǵoı. Eshqashan bas tartýǵa bolmaıdy. Qazaqstan meniń boıymdaǵy kúres rýhyn oıatty.
– Siz Olımpıada medalinen aıyryldyńyz, biraq sodan keıin aqtaldyńyz. Qaıta dáleldeý qanshalyqty qıyn boldy?
– Shynyn aıtsam, sol kez meniń ómirimdegi eń qıyn synaqtardyń biri boldy. Biraq men shyndyqtyń meniń jaǵymda ekenin bildim. Sondaı qıyn sátte Qazaqstan maǵan zor qoldaý kórsetti. Bul qoldaý maǵan kúsh berdi.
– Siz sporttaǵy mansabyńyzdy aıaqtaǵanda qandaı sezimde boldyńyz? Jalpy, qazir nemen aınalysyp júrsiz? Jaryssyz, jattyǵýsyz ýaqytyńyz qalaı ótip jatyr?
– Bul kezeń maǵan ońaıǵa soqpady. Óıtkeni, sport – meniń ómirim. Biraq bul jolda da Qazaqstan menimen birge ekenin tanytty. Qazir men ózimdi basqa qyrymnan tapqandaımyn. Otbasymdaǵy kishkentaı ulym men qyzyma analyq mahabbatymdy arnap, kóp ýaqytymdy bólemin. Biraq sport meniń ómirimniń bir bóligi bolyp qala beredi. Árkez óz tájirıbemdi jas sportshylarǵa úıretýge daıynmyn. Qazaqstannyń atyn shyǵaratyn kóptegen chempıondar shyqsa, oǵan óz úlesimdi qossam deımin. Kezinde joldasymmen «Maııa Maneza» atty shyǵys medısınasy ortalyǵyn ashqan edik. Qazir sol ortalyqtyń jumysyn jalǵastyryp jatqan jaıym bar.
Eń bastysy – tilek pen rýhtyń kúshi
– Aýyr atletıka áıelderdiń qoly emes degen pikirge qalaı qaraısyz?
– Iá, ondaı pikirdiń bar ekenin bilemin. Biraq men ózimdi mysal etip, sportta jynys joq ekenin dáleldedim. Bul jerde eń bastysy – tilek pen rýhtyń kúshi der edim.
– Aýyr atletıka adamnyń minezine áser etedi degen pikirge kózqarasyńyz qalaı? Siz ómirde qandaı adamsyz?
– Kim bilsin, biraq men olaı demes edim. Máselen, maǵan qarańyzshy, únemi kúlimsirep júremin, meıirimdi adammyn!
– Ómirde sizge qaıta platformaǵa shyǵý múmkindigi berilse, keliser me edińiz?
– Árıne, keliser edim. Óıtkeni, tuǵyrda turyp Qazaqstan baıraǵyn kóterý buıyra bermeıtin baqyt!