Oqý-aǵartý mınıstrliginiń baspasóz qyzmeti «100 jańa esim – 100 novyh lıs» taqyrybyn jalǵastyrýda.
Bul joly mınıstrlik Jetisý oblysy Alakól aýdany Dostyq aýylynyń orys tili men ádebıeti pániniń muǵalimi Botagóz Omarovany tanystyrmaq, dep habarlaıdy aqshamnews.kz.
Ustaz 50 úzdik kreatorlardyń qatarynda TikTok-tyń bedeldi Discover List-2025 tizimine endi. Discover List — bul kórermendi shabyttandyryp, túrli trend jasap júrgen, álemniń ár túkpirindegi túrli mazmundaǵy kontent avtorlaryna arnalǵan TikTok jobasy. Botagóz Omarova osy tizimdegi «Oqytýshylar» sanaty boıynsha erekshelenip, bilim berý mazmunyn damytýǵa qosqan úlesi úshin baǵalandy.
20 jyldan astam eńbek tájirıbesi bar ustaz 3 jyl buryn TikTok áleýmettik jelisinde jeke paraqshasyn júrgize bastaǵan. Osylaısha, sabaq berý prosesindegi ádistemeleri men oqytýǵa standartty emes kózqarasy aýdıtorıanyń nazaryn aýdarǵan. Qysqa beınerolıkterde Botagóz til men ádebıetti kreatıvti tásil arqyly úırenýdi usynady. Jeli paıdalanýshylary pedagogten tek sabaqtaǵy erejelerdi úırenip qana qoımaı, sonymen qatar mádenıetti, taza sóıleýge jáne tildiń erekshelikterin ońaı túsinýge bolatynyn jazǵan.
«Men tildi úırený — erejelerdi este saqtaý emes, qyzyqty proses ekenin kórsetkim keldi», — deıdi pedagogtiń ózi.
Qazaqstanda TikTok platformasy tanymal jáne ony bilim berý salasynyń mamandary belsendi paıdalanady. Máselen, oqytýshylardy qoldaıtyn birqatar jobalar, sonyń ishinde #ustazdar heshtegimen baıqaýlar da ótkizilip keledi. Mundaı jobaǵa 2023 jyly Botagóz Omarova da qatysyp, jeńimpaz atanǵan. Bul baıqaý ustazdardy pándik bilim alýdyń tartymdylyǵyn arttyrý úshin kontentti qyzyqty etip usynýǵa, túrli tájirıbeler jasaýǵa shabyttandyrady.
Búgingi tańda Botagóz Omarovanyń TikTok-taǵy jeke paraqshasynda 160 myńnan astam jazylýshy bar jáne ol odan da kóp aýdıtorıany tarta otyryp, tikeleı efırde tegin sabaqtar ótkizip keledi. Onyń tanymaldyǵy — kópjyldyq eńbektiń, óz kásibine degen adaldyqtyń jáne bilim berýdi barlyǵyna qoljetimdi jáne qyzyqty etýge degen umtylystyń nátıjesi.