Sportshynyń UFC-degi alǵashqy jeńisi
Qytaıda turatyn qazaq faıteri Saıran Nurdanbek (19-4) UFC-degi ekinshi aıqasyn ótkizdi, dep habarlaıdy Almaty-akshamy.kz QazAqparatqa silteme jasap.
Sports.kz-tiń málimetinshe, ol Las-Vegasta ótken UFC Fight Night 198 týrnırinde amerıkalyq Shon Sorıanomen (14-7) jekpe-jekke shyqty. Jartylaı jeńil salmaqtaǵy aıqas úsh raýndqa sozylyp, tóreshilerdiń biraýyz sheshimimen Nurdanbektiń jeńisimen aıaqtaldy. Saıran Nurdanbek bul jekpe-jekte anderdog sanalǵanyn aıta keteıik.
Osylaısha, Saıran Nurdanbek MMA-degi kásibı mansabynda jıyrmasynshy ret jeńisine jetti, al Shon Sorıano osymen segizinshi ret jeńilip otyr.
Aıta keteıik, qazaq faıteri úshin bul UFC-degi alǵashqy jeńisi. Ol promoýnshynda birinshi ret mamyrda óner kórsetken, alaıda tóreshilerdiń biraýyz sheshimimen aýstralıalyq Djoshýa Kýlıbaodan (9-1-1) jeńilip qaldy.
Ultimate Fighting Championship – AQSH-ta, Las-Vegasta ornalasqan amerıkalyq sport uıymy. Ol álem boıynsha aralas jekpe-jekter ótkizip otyrady.