Taılandtyń Chıangmaı qalasynda ótken Azıa chempıonaty qazaqstandyq boksshylar úshin jarqyn jeńistermen aıaqtaldy. Erler men áıelder quramasy 10 medaldan jeńip, jalpy sany 20 júlde enshilese de, bul jetistik kópshiliktiń syn-eskertpesine ushyrady. Ásirese, syn sadaǵy erler quramasyna baǵyttaldy, dep habarlaıdy aqshamnews.kz
Chempıonattyń kútpegen ózgerisi
Bastapqyda chempıonat Ózbekstan astanasy Tashkentte ótýi tıis edi. Biraq kútpegen jerden týrnır Chıangmaıǵa aýystyryldy. Ózbek boksshylary úshin bul kedergi bolmady, olar medal sany boıynsha jalpy esepte birinshi oryn aldy. Erler quramasy segiz altyn medal jeńip, aıqyn basymdyq tanytty.
Qazaqstannyń erler quramasy: Jeńister men ókinishter
Qazaqstandyq boksshylardyń erler arasyndaǵy kórsetkishi aralas sezim qaldyrdy. 13 sportshynyń toǵyzy fınalǵa jetse, tek tórteýi altyn medal jeńip aldy. Chempıondar qatarynda Mahmud Sabyrhan, Bekzad Nurdáýletov, Saǵyndyq Toǵambaı jáne quramanyń kapıtany Aıbek Oralbaı bar.
Biraq kóńilge qaıaý túsirgen bir jaıt – fınaldaǵy qazaqstandyqtardyń bes ózbek boksshysynan jeńilýi. Ózbekstan quramasy segiz altynnyń beseýin Qazaqstan boksshylarymen ótken jekpe-jekte ıelendi.
Syn men úmit
Chempıonat qorytyndysy Qazaqstan boksynda turaqty nátıjege qol jetkizý qajettigin kórsetti. El jankúıerleri álemdik deńgeıdegi jetistikterdi kútkenimen, keıbir jekpe-jekterdegi taktıkalyq jáne fızıkalyq álsizdikter ashyq baıqaldy. Erler quramasynyń bolashaǵyna qatysty suraqtar týyndap, daıyndyq ádisterin qaıta qaraý qajettigi aıtylýda.
Qazaqstandyq boksshylar úshin Azıa chempıonaty - sabaq alatyn mańyzdy tájirıbe boldy. Alda olardy úlken synaqtar men jańa múmkindikter kútip tur. Endigi maqsat – jetistikterin arttyryp, jankúıerlerdiń senimin tolyq aqtaý.
Taqyrypqa oraı
Tursynǵalı Edilov: Shyndyqty moıyndamaý — qatelik
Ózbek boksshylarynyń búgingi jetistikteri men psıhologıalyq ústemdigi — olardyń álemdik deńgeıde kósh bastap turǵanyn kórsetedi. Alaıda "sportshylar psıhologıalyq turǵyda daıyn emes" degen pikir birjaqty emes dep oılaımyn. Iá, ózbek boksshylary qazirgi tańda álemdik arenany dúr silkindirip tur. Biraq bul tek sportshylardyń ǵana emes, olardyń jattyǵý júıesi men taktıkasynyń nátıjesi. Olar árbir jekpe-jekke muqıat daıyndalyp, qarsylasynyń álsiz jaqtaryn paıdalanýǵa tyrysady. Qazaqstan da osyndaı júıeli ádisterdi qabyldap, sportshylardy moraldyq turǵydan kúsheıtýi qajet.
Psıhologıalyq barerdi joıý úshin, eń aldymen, júıeli jeńister qajet. Árbir jeńis sportshyǵa óz kúshine degen senimdilik beredi. Budan bólek, bapkerler sportshylardyń taktıkalyq qabiletterin ǵana emes, psıhologıalyq turaqtylyǵyn da jetildirýge mán berýi tıis. Bizdiń sportshylar tek ózbek boksshylaryna ǵana emes, kez kelgen qarsylasqa qarsy myqty daıyndyqpen shyǵýy kerek.
Ótkende kýbalyqtarmen kúresip, olardy jeńýge úırengenimizdeı, ózbek boksshylaryna da laıyqty qarsylas bolýymyzǵa senimim mol. Biraq bul tek ýaqyt pen qajyrly eńbekti qajet etedi. Endigi mindet — osy jolda naqty qadamdar jasap, kelesi býyn boksshylaryn myqty psıhologıalyq negizde daıyndaý. Ózbekstannyń búgingi "Birinshi nómirli" statýsyna qaramastan, Qazaqstan boksynyń qaıtadan álemdik arenada ústemdik quratyn kúni alys emes dep senemin.