Almaty qalasy Qoǵamdyq damý basqarmasynyń Qoǵamdyq damý ortalyǵy búginde megapolısimizdegi stýdentter men elge tanymal bilikti mamandar arasynda bilim men tájirıbe almasýyna jaǵdaı jasap, bolashaq mamandarǵa qoldaý kórsetip, shabyt berý úshin biregeı alań quryp úlgergen.
Naqtyraq aıtsaq, máselen, 2023-2024 oqý jylynda Almaty sán jáne qyzmet kórsetý salasy koleji men otandyq tanymal «Aida KaumeNOVA» brendi arasynda memorandýmǵa qol qoıylyp, nátıjesinde atalǵan sán úıinde 3-baǵam «Kıim dızaıneri» 21-6 tobynyń stýdentteri óndiristik tájirıbeden ótip, eki túlek – Toǵjan Seıithan men Aısha Badaq sonda turaqty jumysqa qabyldanǵan bolatyn. Al qazirgi kezde 2-baǵam «Kıim konstrýktory» 23-3 tobynyń tórt stýdenti – Aızara Ýálıhanova, Altyn Maıtybaı, Samal Aslanbek jáne Jasmın Túlkibaı osy sán úıinde óndiristik praktıkadan ótip júr. Jaqsy qyrymen kózge túsken jaǵdaıda, kolejdi bitire salysymen olar da jumysqa alynady.
Iá, memlekettiń «Jastar tájirıbesi» jobasy – jastardy qoldaýdyń negizgi baǵdarlamalarynyń biri. Bul joba oqyp júrgen qyz-jigitterge erteń bitire salyp qaıda baramyn dep tyǵyryqqa tirelip qalmaýy úshin olardyń eńbek naryǵyndaǵy ornyn aıqyndap berýge, qajetti eńbek daǵdylaryna baýlýǵa jáne básekege qabiletin arttyrýǵa baǵyttalǵan.
Qoǵamdyq damý ortalyǵynyń basshylyǵy keshe taǵy bir memorandýmnyń resmı qabyldanýyna muryndyq boldy. Bul joly «Aida Kaumenova Fashion» sán úıi men Almaty tehnologıalyq-ekonomıkalyq koleji arasynda yntymaqtastyq týraly kelisimge qol qoıyldy. Bul kolej stýdentteri de tanymal dızaıner Aıda Kaýmenovanyń dárisin tyńdap, tájirıbesinen bilim túıip, tańdaǵan mamandyǵynyń qyr-syryn meńgerý múmkindigine ıe boldy. Iaǵnı, shyǵarmashyl jastar dýaldy júıe boıynsha teorıany praktıkamen ushtastyryp, eki jaqty da qatar alyp júrmek.
Resmı rásimnen keıin Almaty tehnologıalyq-ekonomıkalyq koleji stýdentteri ózderiniń balań shyǵarmalaryn, ıaǵnı qolynan, ıneden endi shyqqan kıimderin tanystyrdy. Ine-jipke jaqyn jastar tikken toptamalarda ulttyq naqyshtardyń basym ekenin baıqadyq. Olar qazaqtyń tarıhy men dástúrin búgingi zamanaýı sánmen ushtastyra bilgen. Árbir jarqyn kıimnen stýdentterdiń izdenisi men jańashyldyǵyn kórdik. Álemdi ádemi kıindirýge talpynǵan jastarǵa sáttilik tiledik.
– Mine, búgin taǵy bir memorandýmǵa qol qoıyldy. Bul seriktestik otandyq shyǵarmashylyq ındýstrıany damytý men bolashaq mamandardy qoldaý barysyndaǵy mańyzdy qadam dep sanaımyz. Oqý – bólek, al sol oqyǵanyńyzdy tájirıbemen ushtastyrý – ekinshi álem. Sondyqtan biz stýdentter men kásiporyndar arasyna altyn kópir ornatyp, eki jaqty jaqyndastyryp, jastardyń jumysqa ornalasyp ketýine jaǵdaı jasaýdy maqsat ettik. Endi bul kolej stýdentteri de Aıda Kaýmenovanyń tanymal sán úıinde eskız jasaýdan bastap, daıyn kıim tigip shyǵarǵanǵa deıingi prosesti úırenýine múmkindigi bar. Osy arqyly sán álemine jańa tynys berip, shyǵarmashyl talantty jastarǵa dańǵyl jol kórsetip beretin bolamyz, – deıdi Qoǵamdyq damý ortalyǵynyń ǵylymı jáne bilim berý salasymen ózara árekettesý bólimi basshysy Baqytgúl Qasymetova.