Germanıada ataqty Frankfýrt kitap jármeńkesi bastaldy.
Kitapsúıer qaýymǵa arnalǵan eń kóne kórmege bıyl 75 jyl tolyp otyr. Uıymdastyrýshylardyń aıtýynsha, is-sharaǵa 100 myńnan astam meıman qatysady. Jármeńkege qazaq baspagerleri de barǵan, dep habarlaıdy Almaty-akshamy.kz 24.kz-ke silteme jasap.
Bıyl 100-ge jýyq memleketten 4 myń baspa ónimi usynylyp otyr. Arasynda jalpy ádebıet, balalar shyǵarmalary, elektron kitaptar, karatalar men kóne qoljazbalar bar. Al Qazaqstannan 5 baspa barǵan. Máselen, «Almatykitap» Ybyraı, Shoqan, Abaı syndy qazaq ǵulamalarynyń murasy men ómiri týraly tom-tom kitaptardy tanystyryp jatyr. Olar ulttyq naqyshta beınelengen kitaptarǵa suranys joǵary deıdi.
«Biz erekshe daıyndyqpen keldik. Osy joly ulttyq merekemiz - Naýryz týraly balalarǵa arnalǵan jınaq alyp keldik. Tili - jeńil ári qyzyqty. Basqa elderdiń balalaryna Naýryz meıramynyń mańyzyn túsindiredi. Qosymsha QR kod arqyly qazaqtyń ásem ánderin tyńdaýǵa bolady», - deıdi «Almatykitap» baspasynyń prezıdenti Gaýhar Saımasaeva.
«Myna erekshe kitaptarǵa birden kózim tústi. Mysaly, qazaqtyń ulttyq erekshelikteri týraly kitap kıiz úı túrinde ázirlenipti. Mátini de aıryqsha, oqyǵan adamdy birden baýrap alady eken», - deıdi Berlın ýnıversıtetiniń profesory Bostán Dvorak.
Frankfýrt jármeńkesi – oqyrmandardy ǵana emes, sondaı-aq qalamger, baspager, aýdarmashyny bir arnaǵa toǵystyrǵan úlken shyǵarmashylyq alańy. Qazaqstan ókilderi birneshe kelissóz júrgizip úlgergen. Sonyń ishinde, Ulybrıtanıanyń eń aýqymdy baspa úıimen jańa kezdesý ótkizdi.
«Biz qazaqstandyq seriktestermen jyl saıyn kezdesemiz. Ondaǵy 4 baspa úıi jáne basqa kompanıalarmen turaqty baılanystamyz. «Almatykitap» baspasymen jumys istep júrgenimizge 15 jylǵa jýyqtady. Osy joly olarǵa balalar ádebıetinen túrli oqýlyqtar, ensıklopedıa, kitaptarymyzdy usyndyq. Kóńilden shyqqandaryn qazaq tiline aýdaramyz dep otyr», - deıdi baspa úıiniń ókili Branıslav Hrojenchık.
Bul jerde qalamgerlerdiń kitabyn tanystyrýǵa da zor múmkindik bar. Jármeńke 5 kúnge sozylady.