Almatydaǵy №7 Qalalyq klınıkalyq aýrýhana dárigerleri jas jigittiń baýyryna bitken parazıtarly kıstaǵa ota jasap, pasıenttiń ómirin saqtap qaldy. Bul týraly aýrýhananyń baspasóz qyzmeti habarlady.
Habarlamaǵa súıensek, 27 jastaǵy jigit Qalqaman aýrýhanasyna Jetisý oblysynan kelgen. Tekserý barysynda dárigerler baýyrdyń sol jaq bóliginde úlken óskin paıda bolǵanyna kóz jetkizgen. Salmaǵy 2 keliden asatyn kıstanyń dıametri 15 santımetrdi quraıdy.
Anasynyń aıtýynsha, baýyrǵa bitken óskindi jergilikti mamandar osy jyldyń tamyz aıynda anyqtapty.
«Biz aýylda turamyz. Dárigerler mindetti áleýmettik medısınalyq saqtandyrý arqyly tegin ota jasatyp, alyp tastaýǵa bolatynyn aıtty. Biraq keıbir klınıkalar mundaı operasıany jasaýdan bas tartty. Sebebi bul kúrdeli operasıa, onyń ústine balam múgedek. Tanystardan Almatydaǵy 7-aýrýhana jasaıdy degendi estip, osynda keldik», - deıdi naýqastyń anasy.
Aýrýhananyń №1 Hırýrgıa bólimshesi meńgerýshisi Nurlan Máýlenov aýrý usaq taspa qurttardan paıda bolatynyn aıtady. Birtindep ishki aǵzalar zaqymdanyp, ehınokokk kıstasy paıda bolady. Ol kez-kelgen ýaqytta jarylyp ketýi múmkin. Sondyqtan bul adam ómiri úshin asa qaýipti dıagnozdar qataryna jatady.
«Baýyrǵa ehınokokektomıa dep atalatyn ota jasaldy. Operasıa barysynda qurt jınalǵan óskin alyp tastalyp, pasıenttiń ish qurylysy zararsyzdandyryldy. Ota shamamen 4,5 saǵatqa sozyldy. Ádette mundaı operasıalardy jasaǵanda kıstany ashýǵa týra keletin. Bul joly baýyrdyń sol jaq bóligindegi óskindi ashpaı, tóńiregindegi organdar men tinderden ajyratyp aldyq», - deıdi dáriger.
Hırýrgıalyq ota sátti ótti. Qazir naýqastyń jaǵdaıy jaqsy, aýrýhanadan shyqty. Aldaǵy ýaqytta ol ambýlatorıalyq baqylaýda bolmaq.