Búgin Saýd Arabıasy Koróldiginiń astanasy Ar-Rıadta Dúnıejúzilik jaýyngerlik óner oıyndarynyń resmı ashylýy ótti. Green Halls kesheninde ótken aýqymdy is-sharada qatysýshy 80-nen astam memlekettiń ókilderine túrli qoıylymdar, jekpe-jek túrleriniń ereksheligi jaıly kórinister usynyldy, dep habarlaıdy almaty-akshamy.kz.
«Elimizde jekpe-jek túrleri joǵary deńgeıde damyp jatyr. Onyń ústine halyqtyń basym bóligi atalǵan sportty turaqty baqylap otyrady. Boks, dzúdo, karate, kıkboksıń pen armrestlıngten iri jarystarda Ulttyq quramamyz úzdik ondyqta júredi. Saýd Arabıasyndaǵy bul keshendi jarysqa delegasıa jaqsy daıyndyqpen keldi. Keı sport túrlerinen álem chempıonatymen qatar kelgenine qaramastan, básekege qabiletti komanda jasaqtadyq»,-dedi TSM Sport jáne dene shynyqtyrý isteri komıtetiniń mamany, ári Qazaqstan delegasıasynyń jetekshisi Kelbet Nýrǵazına.
Bul oıyndarǵa Qazaqstan 9 sport túrinen 53 atletten delegasıa jasaqtap alyp keldi. Aldaǵy kúnderi alǵashqy júlde jıyntyǵyn samboshylar sarapqa salady. Qazir bozkilem sheberleri salmaq ólshep, erteńgi júlde jolyndaǵy jekpe-jekterine daıyndalyp jatyr.
«Álem chempıonatyna az ýaqyt qaldy. Soǵan qaramastan osynda kóptegen salmaqta myqty sportshylardy alyp keldik. Erler men áıelder úshin de jerebe joldas bolǵan joq. Soǵan qaramastan jaqsy nátıje kórsetýge shama-sharqymyz jetedi. Atap aıtar bolsam, jaýyngerlik samboda Ádilbek Seıisov (64 kg), Asqar Abdýlla (98 kg), al sporttyq samboda Saǵynysh Álipbaı (71 kg), Temirlan Kólbaı elge júldemen oralady degen senimdemiz»,-dedi sambodan Ulttyq quramanyń bas bapkeri Birjan Imaqov Sportty damytý dıreksıasynyń Baspasóz qyzmetine bergen suhbatynda.
Jalpy Ar-Rıadtaǵy oıyndar baǵdarlamasynda 16 sport túri bar. Bul qatardaǵy dzúdo, taekvondo, kúres, semserlesý men boks Olımpıada sanatynda. Sondaı-aq aıkıdo, armrestlıng, jıý-jıtsý, karate, kendo, kıkboksıń, taı boksy (mýaı-taı), sambo, savat (fransýz boksy), sýmo men ýshý bar. Bul keshendi jarystyń (World Combat Games) tarıhy 2010 jyldan bastaý alady. Alǵash ret Qytaıdyń astanasy Beıjińde 27 tamyz ben 4 qyrkúıek aralyǵynda ótken oıyndarda sporttyń 13 túrinen úzdikter anyqtalǵan. Qazaqstan delegasıasy 9 sport túrinen 45 atlet aparyp, 1 altyn, 2 kúmis, 3 qola medalge ıe bolǵan.
Altyn – Erlan Tlýmbetov (69 kg, jıý-jıtsý);
Kúmis – Nurlan Tlýmbetov (77 kg, jıý-jıtsý),
Arman Sanserbın (68 kg, sambo),
Arman Shylmanov (+80 kg, taekvondo);
Qola – Azamat Nurpeıisov (75 kg,
kıkboksıń (fýlkontakt) Nurbolat Sengerov (82 kg, mýaıtaı),
Jumageldi Jetpisbaev (70 kg, pankratıon).
Odan keıin araǵa 3 jyl salyp kezekti Sankt-Peterbýrg qalasy alyp, 15 sporttan 135 júlde jıyntyǵynyń ıegerlerin anyqtap bergen. Elden barǵan 5 sport túrinen 20 jekpe-jek sheberi 2 qola júldege qol jetkizgen. Olar: Tileýǵabyl Amantorıev (62 kg, jıý-jıtsý), Janserik Ámirjanov (67 kg, mýaıtaı).
Sosyn, birshama ýaqyt boıy kezekti dodany uıymdastyrýdyń reti túspedi. Jan-jaqty kelissózderden keıin Taıbeıge sol múmkindik berilgenimen, ol da keıinge shegerildi. Al IV báseke 2021 jyly Qazaqstannyń bas qalasy Astanada ótýge tıis bolǵan. Alaıda koronavırýs pandemıasyna baılanysty álem atletteri bul synda baq synaı alǵan joq. Besinshi jarysty uıymdastyrýdy bıyl Saýd Arabıasynyń Koróldigi óz moınyna aldy. Osy ýaqytqa deıin dúnıejúzilik jaýyngerlik óner oıyndarynda 77 memlekettiń sportshysy júlde alǵan. Qazaqstan jalpy esepte 1 altyn, 3 kúmis jáne 5 qola medalmen 37-oryndy Gonkong jáne Serbıamen bólisip tur.
