27 aqpan kúni saǵat 18.00-de Abaı atyndaǵy Qazaq ulttyq opera jáne balet teatrynyń úlken sahnasynda kórnekti baletmeıster, Qazaq KSR Halyq ártisiniń 90 jyldyǵyna oraı Záýirbek Raıbaevty eske alý keshi ótedi.
Onyń esimi qazaq baletiniń tarıhy men damýyndaǵy basty tulǵalardyń qatarynda tur. Z.Raıbaev óz shyǵarmashylyǵymen Qazaqstandaǵy ulttyq balet óneriniń qalyptasýy men damýynyń tutas bir dáýirin belgiledi. 1954 jyly Abaı atyndaǵy Qazaq opera jáne balet teatrynda eńbek jolyn bastap, balet ártisinen bas baletmeısterge deıin jetti.
Onyń QazUOBT sahnasynda qoıǵan bir aktili baletteri – álemdik horeografıalyq muranyń monýmentaldy eńbekterin erek túsiný, KSRO halyqtarynyń konserttik bı baǵdarlamalary ulttyq balet óneriniń Altyn qoryna endi. Baletmeıster retinde Raıbaev "Shopenıana", "Francheska da Rımını" men "Bolero" bir aktili baletterdi, Ǵazıza Jubanovanyń mýzykasyna "Hırosıma" bir aktili baletin (1966), Q.Qojamıarovtyń "Chın-Tomýryn" (1968), S. Prokofevtiń "Romeo men Djýlettasyn" (1972), "Petá men qasqyr" (1972) bir aktili balalar baletin, A. Hachatýránnyń "Spartagyn" (1974), A. Oneggerdiń "Erkek pen Áıel" (1979) bir aktili baletin, I. Stravınskııdiń "Oıyn kartalary" bir aktili baletin (1979), T.Myńbaevtyń "Freskalaryn" (1981), A. Glazýnovtyń "Raımondasyn" (1984), R. Shedrınnyń "Ozornye chastýshkı" bir aktili baletin (1992), A. Arenskııdiń "Egıpet túnderi" bir aktili baletin (1994), B. Kydyrbektiń "Ajdaha men Qarlyǵashyn" (1996) jáne Borodınniń "Knáz Igor" operasynan "Poloveskıı stanyn" (2002) qoıdy.
“Záýirbek Ǵalıulynyń jeteksheliginde jumys isteý, onyń qoıylymdary men premeralyq spektáklderinde basty partıalardy oınaý, onymen birge repetısıa jasaý, sonda onyń engizip otyrǵan kózge kóriner-kórinbes biraq jarqyn núanstaryna kýá bolý, sheberligin boıyńa sińirý maǵan shynaıy baqyt ákeldi. Ustaz retinde ol baı tájirıbesimen bólisip, ishki potensıaldy taýyp, ashýǵa tyrysatyn. Záýirbek Raıbaevtyń shákirti bolýym men úshin úlken mártebe", - deıdi balet trýppasynyń kórkem jetekshisi, QR Halyq artısi Gúljan Tútkebaeva.
Kórnekti de daryndy ártistiń qurmetine Abaı atyndaǵy QazUOBT balet trýppasynyń jetekshi solıseri sahnada Z.Raıbaev qoıǵan áıgili balet úzindilerin, sondaı-aq onyń ataqty konserttik nómirlerin usynady. Eske alý keshinde kórermenderge horeograftyń shyǵarmashylyq joly, Qazaqstannyń balet ónerine qosqan úlesi týraly fılm kórsetiledi.
Teatr 88-shi maýsymyn Abaı atyndaǵy QazUOBT balet trýppasynyń kórkemdik jetekshisi, qoıýshy-horeografy, QR Halyq ártisi Gúljan Tútkebaeva redaksıasynda Z.Raıbaevtyń horeografıasyna qoıylǵan T.Myńbaevtyń «Freskalar» baletin qalpyna keltirýmen jabýdy josparlap otyr.