Eki apta boıy qatysýshylar kúrdeli, beıtanys jerde urys qımyldarynyń ártúrli elementterin pysyqtady
Úndistanda "KazInd" qazaqstandyq-úndilik kezekti birlesken oqý-jattyǵýy ótti. Oǵan Qazaqstan Qarýly Kúshterinen "Ońtústik" óńirlik qolbasshylyǵynyń áskerı qyzmetshileri qatysty, dep habarlaıdy Almaty-akshamy.kz.
Qazaqstan men Úndistannyń qorǵanys mınıstrlikteri arasyndaǵy ekijaqty yntymaqtastyq josparyn iske asyrý sheńberinde ótkizilgen oqý-jattyǵý barysynda eki birikken aralas rota quryldy.
Eki apta boıy qatysýshylar kúrdeli, beıtanys jerde urys qımyldarynyń ártúrli elementterin pysyqtady.
Oqý-jattyǵý barysynda ınjenerlik-saperlik daıarlyq boıynsha sabaqtar ótti. Onda áskerı qyzmetshiler qoldan jasalǵan jarylǵysh qurylǵylardyń, tuzaqtardyń jáne basqa da jarylǵysh zattardyń úlgilerimen tanysty. Sondaı-aq, qabyldaýshy tarap patrúldeýdi uıymdastyrý boıynsha demonstrasıalyq sabaq uıymdastyrdy.
Naqty tabıǵı jáne klımattyq jaǵdaılarda baǵdarlaý jáne ómir súrý erejelerine erekshe nazar aýdaryldy. Al negizgi kezeń barysynda áskerı qyzmetshiler Jýnglı jaǵdaıynda oqý-jaýyngerlik mindetterdi oryndady. Fal boıynsha tikushaqtan qonǵannan keıin jaýyngerler qarý-jaraqpen jumys istedi.
Sonymen qatar, oqý-jattyǵý sheńberinde salmaǵy 10 kelilik qarý-jaraqpen jáne qural-jabdyqtarmen 6 shaqyrym qashyqtyqty eńserý boıynsha tózimdilik jarystary uıymdastyryldy. Márege birinshi bolyp Gvardeısk garnızony tankıster quramasynyń vzvod serjanty Aldıar Muhamadıev keldi.
Qazaqstandyq tarap ókilderi atap ótkendeı, "KazInd-2022" birlesken oqý-jattyǵýyna qatysý áskerı qyzmetshilerge Úndistannan kelgen áriptesteriniń jaýyngerlik daıarlyq ádistemesimen tanysýǵa, ózderiniń jaýyngerlik daǵdylaryn arttyrýǵa jáne múldem beıtanys jerlerde kásibı sheberlikterin kórsetýge múmkindik berdi.
Aıta ketý kerek, "KazInd" qazaqstandyq-úndilik oqý-jattyǵýy tórtinshi ret ótti. Mundaı oqý-jattyǵý alǵash ret 2018 jyly Jambyl oblysynyń "Mátibulaq" polıgonynda ótken bolatyn. Odan keıin 2019 jyly Úndistannyń Ýttarakhand shtatynda, al 2021 jyly "Ońtústik" óńirlik qolbasshylyǵynyń "Aısha-bıbi" polıgonynda birlesken manevrler ótkizildi.