Aqyn Saıat Qamshygerdiń «Qarabaq» atty kólemdi poemasy ázerbaıjan tiline aýdarylyp, Baký qalasyndaǵy «CN-Poliqraf» baspasynan kitap bolyp shyqty. «Qarabaq» poemasy – baýyrlas el Ázerbaıjannyń tarıhy men mádenıetin, Qarabaqtyń azattyq pen erlik jolyn, batyrlardyń qaharmandyǵyn, túrki halyqtarynyń birligin jyrlaıtyn erlik dastany. Kitap Ázerbaıjandaǵy «Aımaqtyq quqyqtyq jáne ekonomıkalyq aǵartý» qoǵamdyq birlestigi men Dúnıejúzilik Jas Túrik Jazýshylar odaǵynyń birlesken bastamasymen jaryq kórdi. Bul poema – qazaq pen ázerbaıjan halyqtarynyń baýyrlastyǵy men dostyǵynyń poetıkalyq kórinisi.
Aqyn bul poemany jazarda eki jyl izdenip, zerttep, kóp kitaptar oqyp, ınternettegi materıaldardy saralap baryp jazǵanyn aıtady. Saıat Qamshyger birneshe ret Ázerbaıjanǵa arnaıy baryp, snarádpen atqylanǵan jerlerdi óz kózimen kórip, áskerılermen kezdesken, sheıit bolǵan jaýyngerlerdiń otbasymen sóılesken. Qurban bolǵan sarbazdardyń zıratyna zıarat etken. Qarabaqta sheıit bolǵan qazaq batyry Erbol Barymbetovtiń inilerimen, ustazdarymen, dostarymen áńgimelesken. Aqyn osyndaı izdenisterden keıin poemany eki aıda jazypty. Poemanyń jazylýyna rýhanı qoldaý kórsetken marqum, Ázerbaıjan Mıllı Májilisiniń depýtaty, Mádenıet komıtetiniń tóraıymy, ázerbaıjan halqynyń ardaqty qyzy Ganıra Pashaevanyń eńbegin atap ótken jón.
Bul poema aldymen 2023 jyly «Tań-SHolpan» jýrnalynyń 5-sanynda jarıalanǵan. «Ádebıet portalyna» da shyqty. Qazaq aqynynyń poemasyn ázerbaıjan tiline tanymal aqyn, jýrnalıs Elshan Ázim aýdardy. Redaktory aqyn, profesor Rasmıa Sabyr boldy. Jobanyń jetekshisi – aqyn, halyqaralyq «Alash» ádebı syılyǵynyń laýreaty Ákbar Qoshaly. «Aımaqtyq quqyqtyq jáne ekonomıkalyq aǵartý» qoǵamdyq birlestiginiń tóraıymy Arzý Baǵyrova poemanyń alǵysózin jazǵan. Kitaptyń sarapshylary – Dúnıejúzilik Jas Túrik Jazýshylar odaǵynyń tóraǵasy Intıkam Iashar men Tarıel Ahmedov. Úılestirýshileri – Nılýfár Látıf pen jazýshy Etıbar Muradhanly, kitaptyń dızaıneri – Jasarat Qasymov.
Qazaq aqynynyń ázerbaıjan tiline aýdarylyp, kitap bolyp shyqqanyn baýyrlas Ázerbaıjan eliniń saıttary men basylymdary jarysa jazyp, aqparat berip jatyr. Aldaǵy ýaqytta Qazaqstanda da, Ázerbaıjanda da poemanyń tusaýkeseri, tanystyrylymy, avtordyń qatysýymen oqyrmandarmen kezdesý, ádebı, qoǵamdyq is-sharalar ótedi dep josparlanýda. Bul poemanyń týys halyqtar arasyndaǵy ádebı baılanystyń nyǵaıýyna úles qosary sózsiz. Bul qýanyshty habar Túrki áleminiń yntymaǵy men birligi úshin mańyzdy oqıǵa bolyp otyr.