Almatydaǵy Ábilhan Qasteev atyndaǵy Memlekettik óner mýzeıinde kórnekti sýretshi Oral Tańsyqbaevtyń biregeı retrospektıvti kórmesi ashyldy. Kórme Ózbekstannyń mádenıet jáne ónerdi damytý qorynyń (ACDF) uıymdastyrýymen jáne Qazaqstan Respýblıkasynyń Mádenıet jáne aqparat mınıstrliginiń qoldaýymen uıymdastyryldy.
«Bul kórme Qazaqstan men Ózbekstan arasyndaǵy mádenı yntymaqtastyqty nyǵaıtý jolyndaǵy taǵy bir qadam ispettes. Kórme mýzeıdiń 90 jyldyq mereıtoıymen qatar, oǵan Ulttyq mártebe berilgen jyly ashylyp otyr, bul elimizdiń mádenı ómirindegi erekshe oqıǵa», – dep atap ótti Ábilhan Qasteev atyndaǵy Memlekettik óner mýzeıiniń dırektory Gúlaıym Musaǵulqyzy.
Bul kórme sýretshiniń sońǵy 40 jyldaǵy aýqymdy kartınalaryn usynady. Ónersúıer qaýym Tashkent qalasyndaǵy Memlekettik óner mýzeıi men Oral Tańsyqbaevtyń mýzeı-úıinen, Núkis qalasyndaǵy Qaraqalpaqstan Respýblıkasy Memlekettik óner mýzeıinen ákelingen, sonymen qatar Ábilhan Qasteev atyndaǵy Memlekettik óner mýzeıiniń qorynan alynǵan 78-ge jýyq keskindeme jáne grafıka týyndylaryn tamashalaı alady.
Ekspozısıa – Oral Tańsyqbaevtyń ómiri, onyń dramaǵa toly shyǵarmashylyq taǵdyry men sheberdiń qoltańbasynyń kúrdeli evolúsıasy týraly, bastapqy kezeńderdegi modernısik eksperımentterden bastap, tereń sımvolızm men fılosofıalyq maǵynaǵa toly monýmentaldy peızajdarǵa deıin keńinen tanystyrady.
Kórmede O.Tańsyqbaevtyń orys avangardynyń jáne fransýz modernıseriniń yqpalyn kórsetetin alǵashqy týyndylaryna erekshe nazar aýdarylady. Eksponattar arasynda ataqty «Kúreń kúz», «Avtoportret» kartınalary, sondaı-aq, Uly Otan soǵysy kezeńindegi týyndylar men «jeńildik» kezeńiniń kórnekti peızajdary usynylady.
Kórme maýsymǵa deıin jalǵasady.