Qazaqstan halqy eldegi saıası jáne áleýmettik-ekonomıkalyq jaǵdaıǵa qalypty optımısik kózqaras bildirýde. Qoǵamdyq saıasat ınstıtýty júrgizgen sońǵy áleýmettik zertteý nátıjeleri boıynsha, respondentterdiń 70%-dan astamy Qazaqstan durys baǵytta damyp keledi dep esepteıdi. Bul týraly Aqshamnews.kz saıty habarlaıdy.
Zertteý nátıjeleri boıynsha, el damýyna senimdilik bildirýshiler arasynda aýyl turǵyndary (80,7%), 24 jasqa deıingi jastar (78,9%) jáne áıelder (72,2%) basym. Bul toptar eldegi reformalardy oń qabyldap, memlekettik saıasatqa senim arta bastaǵanyn kórsetedi.
Saıası ahýalǵa qatysty oń pikir bildirgender sany – 76,5%, al áleýmettik-ekonomıkalyq jaǵdaıǵa qanaǵattanýshylar – 67%. Sarapshylar bul kórsetkishterdi halyqtyń memleket júrgizip otyrǵan ózgeristerge qoldaý kórsetýi jáne bolashaqqa senimmen qaraýy retinde baǵalaıdy.
Saıası saladaǵy ózgerister – azamattarǵa aýyl jáne aýdan ákimderin tikeleı saılaý quqyǵyn berý, saılaý júıesiniń ashyqtyǵyn qamtamasyz etý, Konstıtýsıalyq Sotty qalpyna keltirý syndy reformalar – eldiń demokratıalyq damýyna tyń serpin berdi. Sonymen qatar, genderlik teńdik máselesi de kún tártibine shyǵyp, áıelderdiń qoǵamdyq-saıası ómirge belsendi aralasýyna jol ashty.
Áleýmettik-ekonomıkalyq salada da mańyzdy nátıjeler baıqalýda. Búdjet salasy qyzmetkerleriniń jalaqysy aıtarlyqtaı ósti, túrli áleýmettik qoldaý baǵdarlamalary iske qosyldy. Jer resýrstaryn ádil bólý máselesi sheshile bastady, al zıandy óndiristerde jumys isteıtin azamattardyń zeınetke shyǵý jasy tómendetildi.
Zertteýge qatysqan azamattardyń 89%-y óz kóńil-kúıin oń dep baǵalaǵan. Ásirese, 18-35 jas aralyǵyndaǵy jastar, joǵary bilimdi azamattar, otbasyly adamdar men boıdaqtar pozıtıv kózqarasta. Bul kórsetkish – qoǵamdaǵy jalpy áleýmettik-psıhologıalyq jaǵdaıdyń turaqtylyǵyn bildiredi.
Psıhologtardyń pikirinshe, halyqtyń kóńil-kúıi men senimi – áleýmettik turaqtylyqtyń negizgi kórsetkishteriniń biri. Memleket tarapynan jasalyp jatqan naqty is-sharalar men qoldaý tetikteri adamdardyń ómir sapasyna tikeleı áser etýde.
Qazaqstan halqy eldiń damý baǵytyna senim artyp otyr. Qoǵamda qalyptasqan optımızm – júrgizilip jatqan reformalardyń nátıjeliliginiń belgisi. Bul senimdi saqtaý úshin bılik ashyqtyqty, ádilettilikti jáne turaqty dıalogty odan ári nyǵaıtýy qajet.