Oral qalasynyń Sarytaý shaǵynaýdanynda (Zachagansk) "VAZ-2114" júrgizýshisi rólge ıe bola almaı, jaryq baǵanasyna soǵylyp, kólik tolyǵymen aýdarylyp ketken, dep habarlaıdy Aqshamnews.kz tilshisi.
Batys Qazaqstan oblystyq Polısıa departamentiniń málimetinshe, oqıǵa 8 qyrkúıekte saǵat 01:30 shamasynda Kúltegin kóshesinde tirkelgen.
"8 qyrkúıek saǵat 01:30-de "VAZ-2114" júrgizýshisi Kúltegin kóshesimen kele jatyp, rólge ıe bola almaı, jaryq baǵanasyna soqtyǵysyp, keıin kólik aýdaryldy. Jol apaty saldarynan kóliktiń jolaýshysy aýrýhanaǵa jetkizý kezinde alǵan jaraqatynan qaıtys boldy", – delingen Batys Qazaqstan oblysy Polısıa departamentiniń baspasóz qyzmetiniń habarlamasynda.
Atalǵan derek boıynsha qylmystyq is qozǵaldy. Tergeý júrgizilip jatyr. Kólikti júrgizgen adam ustalyp, ýaqytsha ustaý ızolátoryna qamaldy.