Dinı ekstremızm men terorızmniń aldyn alý boıynsha aqparattyq túsindirý tobynyń múshelerine arnalǵan oqý-semınar ótti.
Dindi ózderiniń saıası maqsattaryna qoldanatyn ekstremıstik jáne terorıstik uıymdardyń dittegeni – memlekettiń tutastyǵyna, ishki qaýipsizdigine jáne qoǵamdaǵy turaqtylyq pen tynyshtyqqa nuqsan keltirý. Adamdardyń dinge degen senimin paıdalanyp, rýhanı qundylyqtardy betperde etken jalǵan ýaǵyzshylar destrýktıvti aǵymdardyń ókilderi álemdik deńgeıde alaýyzdyq pen óshpendilik týǵyzady. Dinı ekstremızm men terorızmniń aldyn alýdyń birden bir joly – halyqty durys aqparattandyrý. Osy maqsatta Almaty qalasy Din isteri jónindegi basqarmasynyń uıytqy bolýymen Dinı ekstremızm men terorızmniń aldyn alý boıynsha aqparattyq túsindirý toby qurylǵan. Biraz jyldan beri jumys istep kele jatqan aqparattyq túsindirý tobynyń músheleri jyl saıyn tolyǵyp, jańaryp otyrady. Taıaýda Almaty qalasynda osy aqparattyq túsindirý tobynyń músheleri úshin arnaıy oqý-semınary ótti.
Jıynǵa dintanýshylar, ıslamtanýshylar, psıhologtar men din salasyndaǵy bilikti mamandar qatysty. Spıkerlerdiń aıtýynsha, Almaty qalasy turǵyndary úshin aqparattyq-túsindirý jumystarynyń basty maqsaty – qoǵamnyń radıkaldy ıdeologıaǵa degen ımýnıtetin qalyptastyrý, jastardyń teris aǵymdardyń jetegine ketýine jol bermeý.
«Jumysymyzdyń túp-tórkini halyqqa dinı ektremızm men terorızmniń sońy jaqsylyqqa ákep soqpaıtynyn, adastyratynyn túsindirý. Aqparattyq-túsindirý tobynyń árbir múshesi kez kelgen aýdıtorıamen jumys isteı bilýi kerek. Biz aqparattyq túsindirý tobynyń múshelerin arasynda destrýktıvti aǵymǵa boı aldyrǵan adamdary bar ujymdarǵa jiberemiz. Óıtkeni, teris aǵymda júrgen adam ózimen birge basqa adamdardy da tartýy ábden yqtımal. Sondyqtan bilikti mamandardyń sondaı jerlerge baryp, dáris oqýy mańyzdy. Almaty turǵyndary kez kelgen dinge qatysty suraqtarymen Dinı basqarmaǵa jáne «Nur-Múbárak» ýnıversıtetine barýyna bolady», – deıdi Almaty qalasy Din isteri jónindegi basqarmasynyń basshysy Nurlan Qıqymov.
QR UQK Antıterrorıstik daıyndyq ortalyǵynyń mamany Bolat Shomanovtyń aıtýynsha, aqparattyq-túsindirý jumystaryn júrgizýdiń de ózindik qıyndyqtary bar. Mundaı jaǵdaıda tereń bilim, suńǵylalyq kerek.
«Dinı ekstremızmniń basty sıpaty – adamdarǵa ustanatyn senimi boıynsha óshpendilik pen ozbyrlyqty, sonyń ishinde zorlyq-zombylyqpen nemese kúsh qoldana otyryp shaqyrýmen baılanysty qysym kórsetý, sondaı-aq azamattardyń qaýipsizdigine, ómirine, densaýlyǵyna, senimine nemese quqyǵy men bostandyǵyna qater tóndiretin kez kelgen dinı tájirıbeni qoldaný», – deıdi spıker.
UQK derekterine sáıkes, Qazaqstanda 209 aqparattyq-túsindirý toptary jumys isteıdi, olardyń 16-sy respýblıkalyq, 42-si oblystyq, 151-i aýdandyq.
«Aqparattyq-túsindirý toptaryna mindettelgen tapsyrma – halyqty durys aqparattandyrý, memlekettiń din máselelerine qatysty ustanatyn saıasatyn túsindirý. Sondaı-aq, turǵyndardyń quqyqtyq mádenıetin qalyptastyrý, dinı saladaǵy quqyqtyq saýattylyǵyn kóterý. Eń mańyzdysy, halyqty dinı ekstremızm men terorızm qaýpi týraly habardar etý, din salasyndaǵy máselelerdi neǵurlym tereń túsiný, synı oılaý daǵdylaryn qalyptastyrý, jastar arasynda dinı ekstremızmniń aldyn alý tásilderin engizý», – deıdi QR UQK akademıasynyń qyzmetkeri Rýslan Irjanov.
Byltyrdan beri elimizde «Qaýipsiz el» ulttyq jobasy júzege asyrylyp keledi. Jobanyń maqsaty – Qazaqstan Respýblıkasynda ujymdyq qaýipsizdik pen turaqtylyqty qamtamasyz etý. Búgingi tańda memleket ulttyq qaýipsizdikti qamtamasyz etýge baǵyttalǵan is-sharalardyń keń spektrin ótkizýde. Memlekettik baǵdarlama sheńberinde onlaın keńistikte dinı ekstremızmniń aldyn alý boıynsha qarsy nasıhat jáne aqparattyq-túsindirý ádisteri qoldanylady. Qarsy nasıhat jumysy áleýmettik jelilerde jergilikti Din isteri basqarmalary men «Din máselelerin zertteý ortalyqtary» tarapynan júrgiziledi. Áleýmettik jelilerge din salasyndaǵy ózekti máseleler boıynsha aýdıo-beınematerıaldar, suraq-jaýap, dinı mamandar men sarapshylardyń dáristeri, pikirleri ornalastyrylady. Sonymen qatar, ekstremızm men terorızm ıdeıalaryn nasıhattaıtyn materıaldardy anyqtaý boıynsha buqaralyq aqparat quraldaryna, ınternet-resýrstarǵa, onyń ishinde áleýmettik jelilerge turaqty monıtorıń jumystary júrgiziledi.
«Almaty-akshamy», №23 (6316) 16 aqpan 2023 jyl.