Qasym-Jomart Toqaev YTO Express Co., Ltd kompanıasynyń basqarma tóraǵasy Iý Hýeı Dzáony qabyldady
Kezdesý barysynda elektrondy komersıa, kólik jáne logıstıka salalaryndaǵy ózara tıimdi yntymaqtastyq perspektıvalary talqylandy, dep habarlaıdy Almaty-akshamy.kz.
Qasym-Jomart Toqaev elimizde Alibaba, Wildberries, OZON jáne JDcom sekildi iri marketpleıster jumys istep jatqanyn atap ótti. Qazaqstan 2030 jylǵa qaraı elektrondy saýda úlesin jalpy saýda-sattyq naryǵynyń 20 paıyzyna deıin jetkizýdi josparlap otyr. Áńgimelesý barysynda Prezıdentke Qytaıdyń tez jetkizýge mamandanǵan eń iri logıstıkalyq operatorlarynyń biri bizdiń naryqqa kelip, Ortalyq Azıadaǵy bas keńsesin Qazaqstanda ashýdy kózdep otyrǵany jóninde málimet berildi. Bul ýaǵdalastyq «Qazposhta» aksıonerlik qoǵamy men YTO Express Group arasyndaǵy yntymaqtastyq týraly kelisimge qol qoıý aıasynda bekitiledi.
– Qytaıdyń «Bir beldeý, bir jol» bastamasy aıasynda Sizdiń kompanıańyzben ózara tıimdi yntymaqtastyq ornatý úshin zor múmkindigimiz bar. Búginde elektrondy komersıa – ekonomıkanyń eń jyldam damyp kele jatqan salalarynyń biri. Álemdik JİÓ-niń shamamen 7 trıllıon dollar qarjysy osy saladan quralady. Qazaqstan elektrondy komersıany damytýǵa aıryqsha mán beredi, – dedi Qasym-Jomart Toqaev.
Iý Hýeı Dzáo Memleket basshysyna kompanıanyń Qazaqstandaǵy negizgi jobasy týraly baıandady. Atap aıtqanda, kásiporyn elimizdiń birqatar óńirinde «A» sanatyna jatatyn joǵarytehnologıalyq mýltımodaldy ortalyqtar salýdy josparlap otyr. Mundaı ınfraqurylym taýardy jedel óńdep, ony Eýropa Odaǵy, Eýrazıalyq ekonomıkalyq odaq jáne Ortalyq Azıa elderine shyǵarýǵa ońtaıly jaǵdaı jasaıdy. Al ıntellektýaldy IT-sheshimderdi engizý logıstıka prosesin tolyqtaı avtomattandyrýǵa múmkindik berip, elektrondy komersıa taýarlarynyń kedennen jyldam ótýin qamtamasyz etedi.