Almatyǵa kún saıyn búkil Latvıa, Astananyń 2 nemese Batys Qazaqstan oblysynyń 5 avtoparki kiredi, dep habarlaıdy almaty-akshamy.kz t.me/almaty_akimat arnasyna silteme jasap.
Polısıa departamentiniń málimetinshe, 10 negizgi magıstral boıynsha Almaty aýmaǵyna jumys kúnderi orta eseppen 400 myńnan astam avtomobıl kiredi. Oblystan qalaǵa kiretin qosymsha 17 jolmen 300 myńnan astam kólik keledi. Osylaısha, Almatyǵa 700 myńnan astam mashına kiredi, bul shamamen qala halqynyń úshten biri – 2,147 mln adam. Bul 2023 jylǵy 6 qazanda juma kúni «Sergek» aparattyq-baǵdarlamalyq kesheni arqyly kóshelerdi baqylaý negizinde alynǵan derekter.
Almatyǵa jumys kúnderi keletin jeke kóliktiń sanyn búkil eldiń avtoparkimen salystyrýǵa bolady. Latvıada halyq sany 1,891 mıllıon adam. Bul rette, elde 730 myńǵa jýyq avtokólik tirkelgen. Bylaısha aıtqanda, oblystan Almatyǵa únemi búkil Latvıa «kiredi». Jergilikti deńgeıde eseptesek, bul Batys Qazaqstan oblysynyń 5 (134 172 kólik) nemese Astananyń 2 avtoparki (326 myńnan astam kólik tirkelgen) degen sóz.
Syrttan kiretin kóliktermen qosa, Almatynyń ózinde 617 myńǵa jýyq avtomobıl tirkelgen. Buǵan oblystan keletin 400 myńnan astam kólikti qosqanda, megapolıs kóshelerinde 1 mln 100 myńnan astam mashına júredi. Basqasha aıtsaq, bul qalamyzdyń árbir ekinshi turǵyny kólik tizgindegendeı jaǵdaı, dep habaılaıdy Almaty ákimdiginiń (https://t.me/almaty_akimat) telegram arnasy.
Anyqtama: bul derekter «Sergek» aparattyq-baǵdarlamalyq kesheni arqyly Almaty qalasynyń aýmaǵynda júretin avtokólikti taldaý negizinde alyndy.
