Qasym-Jomart Toqaev Vladımır Pýtındi týǵan kúnimen quttyqtap, Reseı halqynyń ıgiligi jolyndaǵy onyń asa jaýapty memlekettik qyzmetine tabys tiledi.
Qazaqstan Prezıdenti Reseı kóshbasshysynyń tatý kórshilik, strategıalyq seriktestik jáne odaqtastyq rýhynda turaqty damyp kele jatqan ekijaqty qatynastardy nyǵaıtýǵa qosqan úlesin joǵary baǵalady, dep habarlaıdy Almaty-akshamy.kz Aqordanyń resmı saıtyna silteme jasap.
Qasym-Jomart Toqaevtyń pikirinshe, Vladımır Pýtınniń kúsh-jigeriniń arqasynda Reseı álemdik deńgeıdegi bedeldi derjavaǵa aınaldy. Búginde Reseısiz halyqaralyq mańyzdy máselelerge qatysty eshqandaı sheshim qabyldanbaıdy.
Taraptar 30 qyrkúıekte ótken Qazaqstan men Reseı arasyndaǵy Óńiraralyq yntymaqtastyq forýmynyń qorytyndysyna oń baǵa berdi.
Qos memlekettiń basshylary ekijaqty yntymaqtastyq máseleleri men halyqaralyq problemalar boıynsha belsendi saıası dıalogtardy jalǵastyrýǵa kelisti.