Almatylyq dárigerler 90 jastaǵy naýqastyń jambas býynyn almastyrdy
Almaty qalalyq №4 aýrýhananyń endoprotezdeý bólimi meńgerýshisi Manarbek Áýbákirovtiń aıtýynsha, zeınetker avtobýstan qulap jaraqat alǵan. Dárigerler birden jambas súıeginiń jabyq sýbkapıtaldy synyǵy degen dıagnoz qoıypty, dep habarlaıdy Almaty-akshamy.kz
«Aýrýhanaǵa túsken kezde, pasıent jambasynyń isip ketkenin, qatty aýyratynyn aıtyp shaǵymdandy. Sonymen qatar qımyl-qozǵalysy qıyndap, júrip-turýdan qalǵan. Qabyldaý bóliminde ony keshendi tekserýden ótkizdik, terapevt, travmatolog, anestızıologtan quralǵan mýltıdısıplınarlyq komanda qarady», - dedi Manarbek Áýbákirov.
Jasy toqsandy alqymdaǵan Vera Kım otanyń bul túri jaıly jaqsy biledi. Sondyqtan ol operasıa jasaýǵa birden kelisim bergen.
«Bazardan qaıtyp kele jatyp avtobýsqa mindim.Túserde aıaǵym taıyp ketip joldyń jıegindegi tasqa quladym. Sóıtsem, jambas súıegim synǵan eken. Birden "jedel járdem" shaqyrtyp, olar meni 4-aýrýhanaǵa jetkizdi. Dárigerler qarap shyqqannan keıin ota jasaý qajettigin aıtty. Balalarym da birden kelisti. Operasıa tez, jaqsy jasaldy. Sodan beri mine, bir apta ótti, qazir aıaǵymdy basyp júremin. Qartaıǵan shaǵymda osyndaı qýanysh syılaǵan dárigerlerge rızamyn», - deıdi zeınetker.
Býyn almastyrý jalpy quny 1,5 mln teńgeden bastalatyn joǵary tehnologıalyq operasıalar qataryna jatady. Ota zeınetkerge MÁMS paketi sheńberinde tegin jasaldy.
Endoprotezdeý - sońǵy jyldary kóp jasalyp júrgen manıpýlásıalardyń biri. Sebebi ol býyny aýyratyn syrqattyń aýrýyn jeńildetip, emin-erkin júrip-turýyna múmkindik beredi.
Medısınalyq saqtandyrý qorynyń Almaty qalalyq fılıaly dırektory Tileýhan Ábildaevtyń aıtýynsha, saqtandyrylǵan turǵyndar joǵary tehnologıalardyń kómegimen jasalatyn qyzmetterdi, KT, MRT syndy konsýltatıvtik-dıagnostıkalyq qyzmet túrlerin, reabılıtasıalyq kómekti turaqty túrde paıdalanyp keledi.
«MÁMS paketiniń aýqymy keń. Saqtandyrylǵan azamattar kópshiliktiń qaltasy kótere bermeıtin osyndaı ota túrlerin jasatý qajet bolǵan jaǵdaıda medısınalyq qyzmetti kóp shyǵyndalmaı, kedergisiz paıdalana alady. Sondyqtan barsha azamattardy saqtandyrý júıesine qatysýǵa shaqyramyn», - dedi fılıal dırektory.