Áńgimelesý barysynda olar Qazaqstan men Túrkıa arasyndaǵy strategıalyq seriktestikti damytýdyń perspektıvalary men halyqaralyq kún tártibiniń ózekti máselelerin talqylady.
Memleket basshysy Qazaqstanǵa jumys saparymen kelgen Túrkıanyń vıse-prezıdenti Fýat Oktaıdy qabyldady, dep habarlaıdy Almaty-akshamy.kz Aqordanyń resmı saıtyna silteme jasap.
Qasym-Jomart Toqaev Fýat Oktaıǵa iltıpat bildire otyryp, Túrkıa basshysy Rejep Taııp Erdoǵanǵa júrekjardy sálemin joldady jáne onyń bıyl mamyr aıynda Túrkıaǵa saparmen kelý jónindegi shaqyrtýyn shyn kóńilmen qabyl alǵanyn jetkizdi.
Memleket basshysy saıası, saýda-ekonomıkalyq, ınvestısıalyq jáne mádenı-gýmanıtarlyq salalardaǵy ekijaqty baılanystardyń deńgeıi joǵary ekenin atap ótip, qarym-qatynastardy odan ári jandandyra túsý qajet ekenine nazar aýdardy.
Túrkıanyń vıse-prezıdenti óz kezeginde Prezıdent Rejep Taııp Erdoǵannyń Qasym-Jomart Toqaevqa jáne Qazaqstan halqyna joldaǵan sálemin jetkizdi. Sondaı-aq Túrik eli Memleket basshysynyń saparyn asyǵa kútetinin aıtty.
Fýat Oktaı Qasym-Jomart Toqaevqa Qazaqstan men Túrkıa arasyndaǵy dıplomatıalyq baılanystardyń 30 jyldyǵyna oraı joldaǵan túrik basshysynyń quttyqtaý hatyn jetkizdi.
Túrkıanyń vıse-prezıdenti elimizde syn-qaterlerdi eńserý úshin qabyldanǵan sharalardy jáne Qazaqstan Prezıdentiniń myqty ári batyl basshylyǵymen júzege asyrylyp jatqan reformalardy joǵary baǵalady.
Kezdesý sońynda Qasym-Jomart Toqaev Rejep Taııp Erdoǵannyń bıyl qazan aıynda Nur-Sultan qalasynda ótetin Azıadaǵy ózara is-qımyl jáne senim sharalary jónindegi keńestiń VI samıtine qatysý týraly sheshimine rızashylyq bildirdi.