Qazaqstan Prezıdenti Bınalı Iyldyrymdy qabyldady
Qazaqstan Prezıdenti jýyrda Túrki memleketteri uıymy Aqsaqaldar keńesiniń tóraǵasy bolyp saılanǵan Bınalı Iyldyrymdy qabyldady, dep habarlaıdy Almaty-akshamy.kz Aqordanyń resmı saıtyna silteme jasap.
Bınalı Iyldyrym qabyldaǵany úshin Qasym-Jomart Toqaevqa alǵys aıtyp, Prezıdentti jáne Qazaqstan halqyn el Táýelsizdiginiń 30 jyldyǵymen quttyqtady. Sonymen qatar ekijaqty strategıalyq seriktestikti odan ári nyǵaıtý úshin Túrkıa Respýblıkasynyń Prezıdenti Rejep Taıyp Erdoǵannyń Memleket basshysy Qasym-Jomart Toqaevty kelesi jyly Ankaraǵa resmı saparmen kelýge shaqyrǵan sálemin jetkizdi.
Kezdesýde qazaq-túrik strategıalyq áriptestiginiń qazirgi jaǵdaıy men perspektıvalary, saıası, ekonomıkalyq jáne mádenı-gýmanıtarlyq qarym-qatynas máseleleri talqylandy.
Qasym-Jomart Toqaev joǵary deńgeıdegi saıası dıalogtyń arta túskenin, sondaı-aq memleketter arasyndaǵy saýda-ekonomıkalyq jáne mádenı-gýmanıtarlyq baılanystardyń qarqyndy damyp kele jatqanyn atap ótti.
Qazaqstan Prezıdenti bıyl qarasha aıynda Ystanbulda ótken Túrki memleketteri uıymynyń tarıhı samıtiniń qorytyndysy boıynsha qabyldanǵan sheshimderdiń mańyzdylyǵyna mán berip, Bınalı Iyldyrymdy osy uıymnyń Aqsaqaldar keńesiniń tóraǵasy laýazymyna taǵaıyndalýymen quttyqtady.