Almatynyń bas sanıtarlyq dárigeri qala turǵyndaryn ekpe saldyrýǵa, revaksınasıa jasaýǵa shaqyrdy
Almaty qalasynyń bas sanıtarlyq dárigeri Jandarbek Bekshın Óńirlik komýnıkasıalar qyzmeti alańynda sóılegen sózinde derttiń tómendeýi jáne epıdahýaldyń turaqtanýy tynyshtanýǵa áli sebep emes ekenin atap ótti. Qalada ınfeksıanyń berilý ındeksi 5-shi kún ósip keledi, bul bir naýqastan juqtyrýdyń artqanyn kórsetedi, dep habarlaıdy Almaty-akshamy.kz
J. Bekshın "deltaǵa" qaraǵanda juqpalylyǵy joǵary "omıkron" shtamynyń ákelinýi men taralýyn joqqa shyǵarmaıdy.
Sanıtarlyq-epıdemıologıalyq vedomstvo basshysy epıdemıologıalyq ahýaldyń turaqtanýy ujymdyq ımýnıtettiń qalyptasýyna baılanysty ekenin atap ótti.
«Ekpeler dertti edáýir tómendetýge kómektesti. KVI-men juqtyrýdyń tómendeýi vaksınalanǵan halyqtyń 45%-yna jetip, «qyzyldan» «sary» aımaqqa ótkennen keıin bastaldy», - dedi J. Bekshın.
Ári qaraı ujymdyq ımýnıtet 50%-ǵa jetken kezde, aýrý deńgeıi tómendeı bastady. Búginde Almatyda KVI-ge qarsy ujymdyq ımýnıtet 57,3%-dy (vaksınalanǵandardyń 49,2%-y jáne aýyryp jazylǵan adamdardyń 8,1%-y) quraıdy.
Almatynyń bas sanıtarlyq dárigeri qala turǵyndaryn ekpe saldyrýǵa, al alǵashqy vaksınalanýdan ótkenderge 6 nemese 9 aıdan keıin revaksınasıa jasaýǵa shaqyrdy.
Megapolıstiń bas sanıtarlyq dárigeri kóbinese ınfeksıanyń qozdyrǵyshy bolyp tabylatyn balalar men jasóspirimderdi koronavırýstan qorǵaý mańyzdy dep sanaıdy. Ol sondaı-aq 60 jastan asqan adamdarǵa qaýip tóndiretinin eske saldy.
Atap óterligi, búginde dert juqtyrǵan almatylyqtardyń 98%-y (136 863 adam) - vaksınalanbaǵandar.