Festıvál «Rýhanı jańǵyrý» baǵdarlamasynyń aýqymynda aıqyndalǵan mindetterdi atqarýǵa arnalǵan.
Sharanyń birden-bir maqsaty – dástúrli mýzykany qazaq halqynyń álemdik órkenıetke qosqan eń úlken úlesi retinde keńinen nasıhattaý, dep habarlaıdy Almaty-akshamy.kz
Qazaqtyń jyr-termelerine ejelden erlik taqyryby, eliniń azattyǵy úshin kúresken batyrlardyń erjúrektigi men qaıtpas qaısarlyǵy arqaý bolǵan. Jyraýlar mańyzdy memlekettik máselelermen qatar, otansúıgishtik, adamgershilik, arlylyq týraly oı tolǵaǵan. Babalardan jetken bul asyl muranyń búgingi izbasarlary - aıtýly jyraýlar men jyrshylar óner keshine arnaıy shaqyrtylǵan. Atap aıtqanda, jyraý Almas Almatov, Amandyq Kómekov, Aqmaral Noǵaıbaeva, Naýryzbek mektebin jalǵastyrýshy Abaı Naýryzbek, Elmura Jańabergenova, Uljan Baıbosynova syndy jyr júırikteri Syr súleıleri men Mańǵystaý jyr mektebiniń jyr-termelerin qalyń kórermenge pash etti.
Keshte Shoraıaqtyń Omarynyń «Ósıet sózi», Maılyqojanyń «Minajaty», Turmaǵambettiń «Ósıeti», Súıinbaıdyń «Aqyl-naqyly», Sypyra jyraýdyń termesi sekildi tańdaýly jyrlar oryndaldy. Sondaı-aq Arqa án mektebiniń belgili ókili, kúmis kómeı ánshi Erlan Rysqalı Dýlat Babataıulynyń «Aqjaılaý» men «Sandyqtasyn» oryndap, kóneden jetken Arqa jyr-terme mektebiniń dástúrin jańǵyrtýǵa ózindik septigin tıgizdi.
«Jalpy, qazaq dúnıetanymynda aqyn-jyraýlar poezıasynyń orny erekshe. Áýezben aıtylatyn bul jyrlardyń eń basty taqyryby – eldik máselesi. Qulaqqa jaǵymdy áýezben aıtylǵan otansúıgishtik tilek-múdde halyq júregine tez jetedi. Al jyr-termeler – ótkenimizdiń máńgilik sarynymen astasqan ǵajaıyp shejire, uly dala júreginiń darqan sazy, aıaýly armany», - deıdi keshtiń moderatory profesor Almas Almatov.
Urpaqtar sabaqtastyǵynda ótken men búgindi jalǵap, qundylyqtar aýysyp jatqan kezde qazaqtyń keshe kim bolǵanyn, búgin kim ekenin eske salatyn kıeli ónerdiń biri de biregeıi – jyraýlyq-jyrshylyq dástúr. Sondyqtan bul muranyń jas izbasarlary «Uly Dala eli» óner festıvaliniń arnaıy qonaqtary boldy. Sońynda Qyzylorda men Mańǵystaýdan shaqyrtylǵan jas jyrshylar óner kórsetip, keshti qorytyndylady.
Jyr keshin Almaty qalasynyń turǵyndary men qonaqtaryna tegin tamashalaý múmkindigi berildi.