«Búgin biz Úkimettiń keńeıtilgen otyrysynda óte ózekti máselelerge toqtalamyz. Sebep – bárimizge belgili. Qazir dúnıe júzi túbegeıli ózgeriske ushyrap jatyr. Jahandyq úderister, eń aldymen, elimizdiń ekonomıkalyq ahýalyna áserin tıgizetini anyq.
Jappaı sıfrlandyrý dáýiri, ıaǵnı jańa tehnologıalyq kezeń bastaldy. Kúlli álem múldem basqa jaǵdaıda ómir súredi. Biz soǵan mindetti túrde daıyn bolýymyz kerek. Jańa tehnologıalyq ahýalǵa saqadaı saı turýymyz qajet. Bul – elimizdiń básekege qabiletin arttyryp, turaqty damýyna jol ashatyn asa mańyzdy faktor.
Úkimet pen ákimderdiń jumysy qanshalyqty tıimdi ekenin aldymen ekonomıkanyń damý kórsetkishteri men azamattardyń turmys sapasyna qaraı baǵalaımyz. Osy jumystyń nátıjesi byltyr qandaı boldy? Negizgi mindetter oryndaldy ma? Búgin osy suraqtarǵa toqtalamyz jáne jaqyn arada sheshimin tabýǵa tıis ózekti máselelerdi talqylaımyz»