Sý resýrstaryn basqarýdyń biryńǵaı aqparattyq-saraptamalyq júıesin jasaý kerek. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Memleket basshysy Qasym-Jomart Toqaev aıtty, dep habarlaıdy Almaty-akshamy.kz QazAqparatqa silteme jasap.
«Qazir 500-den astam gıdrotehnıkalyq nysan ábden tozyp tur. Tipti, onyń 200-inde tótenshe jaǵdaı týyndaý qaýpi bar. Kezinde keıbir sý qoımalary buzylyp, qaıǵyly oqıǵa bolǵanyn bilesizder. Osyndaı jáıttiń aldyn alý úshin gıdroqurylymdar jan-jaqty tekserilýge tıis. Apattyq jaǵdaıda turǵan jáne qaraýsyz qalǵan nysandardy baqylaýǵa alý kerek. Qaýip-qaterler kartasyn jasaý qajet. Tótenshe jaǵdaıǵa ákep soqtyrýy múmkin qaterlerdiń aldyn alý úshin naqty sharalardy qolǵa alǵan jón. Sondaı-aq Sý resýrstaryn basqarýdyń biryńǵaı aqparattyq-saraptamalyq júıesin jasaý kerek», – dedi Memleket basshysy.
Prezıdenttiń aıtýynsha, únemshil bolmasaq, taza sý beretin jańa nysandardy iske qosqanmen, tapshylyqty joıa almaımyz. Sý sharýashylyǵy nysandaryn ortalyqtandyryp basqarýǵa jaýapty kásiporyndardyń jumysyna taldaý júrgizilip, sonyń barysynda olardyń tıimdiliginiń tómendigi anyqtaldy.
Qasym-Jomart Toqaevtyń paıymynsha, sý sharýashylyǵy men gıdromelıorasıalyq júıelerdi qaıta qurýǵa baǵyttalǵan halyqaralyq qarjy uıymdarynyń nesıeleri durys ıgerilmeı otyr. Sonymen qatar bul salada kadr máselesi de mańyzdy. Úkimet sý sharýashylyǵy mamandaryn daıyndaıtyn bazalyq ýnıversıtetti belgiledi.
Sonymen qatar Memleket basshysy osy saladaǵy basqarý júıesiniń ózin qaıta júkteý kerek ekenin tapsyrdy. Osy oraıda «Qazsýshardy» qarjylyq jaǵynan turaqty uıymǵa aınaldyrý kerek. Ol sý sharýashylyǵyn ózgertýde jetekshi ról atqarady.